ရွှေညဝါ ဆရာတော်တရားပွဲ ခွင့်ပြုချက်မရဘဲပြုလုပ်သည်ဟုဆိုကာ ပွဲစီစဉ်သူကို တရားစွဲ

ရန်ကုန် (မဇ္ဈိမ)။ ။ ကြည့်မြင်တိုင်မြို့နယ်တွင် ကျင်းပပြုလုပ်ခဲ့သော ရွှေညဝါဆရာတော် တရားပွဲကို ခွင့်ပြုချက်မရှိဘဲ ပြုလုပ်သည်ဟုဆိုကာ တရားပွဲစီစဉ်သူများ တရားစွဲခံရသည်ဟု နိုဝင်ဘာ ၂၀ ရက်တွင် တရားစွဲခံထားရသူက မဇ္ဈိမကို ပြောကြားလိုက်သည်။

အဆိုပါ တရားပွဲမှာ ဆေးရိုးတန်းငြိမ်းချမ်းရေးရပ်ကွက်တွင်နေထိုင်သည့် ဦးနု၊ ဒေါ်ခင်မာကြည်မိသားစုက မှော်ဘီမြို့နယ်၊ ရွှေညဝါတောရကျောင်တိုက်တွင် သီတင်သုံးနေသည့် ဦးပညာသီဟ (ရွှေညဝါဆရာတော်) ကို ကျောင်းဆောင်သစ်ဆောက်လုပ်ရာတွင် အလှူငွေများ လှူဒါန်းမည်ဖြစ်၍ နိုဝင်ဘာ ၁၄ ရက်က ကျင်းပပြုလုပ်ခဲ့သော တရားပွဲဖြစ်သည်။

တာဝန်ယူကျင်းပခဲ့သူ ဦးနုက “လောလောဆယ်တော့ ခေါ်ရုံပဲ ခေါ်ထားသေးပါတယ်။ တရားရုံးတွေ ဘာတွေ ရင်မဆိုင်ရသေးပါဘူး၊ ၂ ရက်နေ့မှာတော့ ရုံးချိန်းခေါ်ထားပါတယ်” ဟု မဇ္ဈိမကို ပြောသည်။

တရားပွဲကျင်းပသည့် နိုဝင်ဘာ ၁၄ ရက် ညနေ ၆ နာရီခွဲက မြို့နယ်အထွေထွေအုပ်ချုပ်ရေးမှူးဖြစ်သူ ဦးကျော်ရဲသွေးမှ တရားပွဲပြုလုပ်မည့်နေရာအား ကြည့်ရှုစစ်ဆေးခဲ့ရာတွင် ဓမ္မပီယဘုန်းတော်ကြီးကျောင်းမုခ်ဦး ဝမှ ထီးတန်းလမ်းမဘက်သို့ မျက်နှာမူပြီး တရားဟောစင်မြင့်ဆောက်ထားကြောင်း နှင့် ထီးတန်းလမ်းပေါ် လမ်းများပိတ်၍ အလှူခံမဏ္ဍပ်များ၊ ပရိုဂျက်တာများ ပြသထားရှိကြောင်း တွေ့ရသည့်အပြင် တရားပွဲကို ည ၈ နာရီမှ ၁၁ နာရီအထိ ပရိတ်သတ် ၅၀၀ ဦးခန့်ဖြင့် ကျင်းပခဲ့ကြောင်း သိရှိထားသည်ဟု ရဲမှတ်တမ်းတွင် ဖော်ပြထားသည်။

ယင်းကဲ့သို့ကျင်းပခဲ့ခြင်းပြီး ခွင့်ပြုချက်မရှိဘဲ တရားပွဲ ဦးစီးကျင်းပသူ ဦးနု၊ ဦးရဲဆွေခိုင်တို့ နှစ်ဦးကို တရားစွဲထားခြင်းလည်းဖြစ်သည်။

“ခွင့်ပြုချက်တင်ပြီးလုပ်တာ ဒီမှာသက်သေခံအထောက်အထားအကုန်ရှိပါတယ်။ သူတို့ကို တင်ပြတယ်။ သဘောတူညီချက်တွေဘာတွေ အကုန်ရထားတယ်လေ။ ရပ်ကွက်ကလည်း လုပ်ချင်တယ်ဆိုလို့ တာဝန်ခံပြီးလုပ်ပေးတာပါ၊ ဘာမှကြီးကျယ်တာလည်းမဟုတ်ဘူ၊ တရားပွဲကိစ္စပဲ မတရားပွဲမှ မဟုတ်တာ”ဟု ဦးနုက ဆိုသည်။

ယင်းတို့နှစ်ဦးကို ရပ်ကွက်နှင့်ကျေးရွာအုပ်စု အုပ်ချုပ်ရေးမှူးဥပဒေပုဒ်မ ၂၁ အားဖောက်ဖျက်ကျူးလွန်ကြောင်း တွေ့ရှိရသဖြင့် ဥပဒေပုဒ်မ ၂၆ နှင့်အညီ ရပ်ကွက်အုပ်ချုပ်ရေးမှူးဖြစ်သူ ဦးကျော်မင်းက နိုဝင်ဘာ ၁၉ ရက်တွင် ကြည့်မြင့်တိုင်မြို့နယ်တရားရုံးသို့ ဦးတိုက်လျှောက်ထားခဲ့ခြင်းလည်းဖြစ်သည်။

အဆိုပါကိစ္စနှင့်ပတ်သက်၍ ရွှေညဝါဆရာတော်က "နိုင်ငံသားတွေရဲ့ နိုင်ငံသားအခွင့်အရေးအရ လွတ်လပ်စွာကိုးကွယ်ခွင့်၊ ယုံကြည်ခွင့်၊ နားထောင်ခွင့်၊ ဖူးမြော်ခွင့်၊ ဒီအခွင့်အရေးတွေကို သူတို့တွေ နားမလည်လို့ သနားတဲ့စိတ်နဲ့ သူတို့ကို တရားသဖြင့် ရင်ဆိုင်သွားဖို့ ကျင်းပရေးခေါင်းဆောင်ဖြစ်တဲ့ တကာကြီးဦးနုကို မိန့်ကြားထားတယ်။ ရပ်ကွက် ကျေးရွာအုပ်ချုပ်ရေးမှူးများ လက်စွဲဆိုတဲ့ စာအုပ်ကိုကိုင်ပြီး တရားစွဲထားတာကိုး၊ စာအုပ်ကြီးတွေနဲ့ လုပ်နေတဲ့ ခေတ်မဟုတ်တော့ပါဘူး"ဟု တရားပွဲစီစဉ်သူများ တရားစွဲဆိုခံရခြင်းအပေါ် မှတ်ချက်ပေးသည်။

လက်ရှိတွင် ရပ်ကွက်အုပ်ချုပ်ရေးမှူး၏ တိုင်တန်းမှုကို ပြစ်မှုကြီးအမှတ် ၁၂၄၅/၁၃၊ ဖြင့် ၄င်းဥပဒေပုဒ်မ ၂၆ အရ အမှုအားလက်ခံခဲ့ပြီး ကြည့်မြင့်တိုင် မြို့နယ်တရားသူကြီး ဒေါ်နွဲ့နွဲ့ရီက ဆက်လက်စစ်ဆေးဆောင်ရွက်နိုင်ရေးအတွက် ဒီဇင်ဘာ ၂ ရက်နေ့တွင် ရုံးချိန်း သတ်မှတ်ထားသည်။

အဆိုပါကိစ္စကို မြို့နယ်အုပ်ချုပ်ရေးမှုးသို့ ဆက်သွယ်မေးမြန်းရာ အုပ်ချုပ်ရေးမှုးရုံးသို့ လာလျှင် ဖြေကြားမည်ဟု ဆိုသည့်အတွက် သွားရောက်ရာတွင် ညနေ ၄ ၄၉ မိနစ်တွင် ရောက်ရှိခဲ့သော်လည်း အုပ်ချုပ်ရေးမှုးမှာ မရှိတော့ဘဲ အဆိုပါ ရုံးမှ ဝန်ထမ်းများကလည်း အုပ်ချုပ်ရေးမှုးကို ဆက်သွယ်နိုင်သည့် ဖုန်းနံပါတ်ကို ပေး၍ မရကြောင်း ပြန်လည် ဖြေကြားလိုက်သည်။

Mizzima - News in Burme