ရွှေကျင်မီးမျှောပွဲတွင် စက်လှေတိမ်းမှောက်

တောင်ငူ၊ အောက်တိုဘာ ၂၁

ပဲခူးတိုင်းဒေသကြီး ရွှေကျင်မြို့တွင် သီတင်းကျွတ်လပြည့်ကျော် ၁ ရက် (အောက်တိုဘာလ ၂၀ ရက်) ကပြုလုပ်ခဲ့သော (၁၆၂) ကြိမ်မြောက် သီတင်းကျွတ် မီးမျှောပွဲတက်ပျံယိမ်း၊ တက်ခုတ်ယိမ်းပြိုင်ပွဲ ကျင်းပနေချိန် မွန်းလွဲ ၂ နာရီခန့်က စက်လှေတစ်စင်း တိမ်းမှောက်ခဲ့သော်လည်း လူသေဆုံးမှု မရှိခဲ့ကြောင်း ရွှေကျင်မြို့နယ် အုပ်ချုပ်ရေးမှူး ဦးခင်သိန်းမောင်က The Voice သို့ ပြောကြားသည်။
“ဖောင်ကို လှေကဝင်တိုက်တာ မှန်ပါတယ်။ လှေပေါ်မှာ ပါတဲ့သူတွေ အားလုံးက ရေကူးကျွမ်းကျင်သူတွေပါ၊ ပွဲတော်ရက်အတွင်း လူအသေအပျောက် မရှိပါဘူး” ဟု ရွှေကျင်မြို့နယ် အုပ်ချုပ်ရေးမှူး ဦးခင်သိန်းမောင်က ရှင်းပြသည်။

ရွှေကျင်မီးမျှောပွဲတွင် စက်လှေတိမ်းမှောက်ပြီး လူတစ်ဦးသေဆုံးကာ လူအချို့ ပျောက်ဆုံးနေသည်ဆိုသော သတင်းများ ထွက်ပေါ်လာပြီးနောက် မြို့ခံအချို့နှင့် ပွဲတော်ကျင်းပရေး တာဝန်ရှိသူများက အဖြစ်မှန်ကို အမြန်ဆုံး သတင်းထုတ်ပြန်ပေးခြင်းကြောင့် ညနေ ၆ နာရီတွင် ရှင်ဥပဂုတ္တမထေရ် မီးမျှောပူဇော်ပွဲကို မူလအစီအစဉ်အတိုင်း ကျင်းပနိုင်ခဲ့ကြောင်း ပွဲတော်ကျင်းပရေး ကော်မတီ အဖွဲ့ထံမှ စုံစမ်းသိရှိရသည်။

အောက်တိုဘာလ ၂၀ ရက်နေ့ မွန်းလွဲ ၁ နာရီခွဲခန့် ဖောင်ကို စက်လှေတိုက်မိရာမှ စက်လှေတိမ်းမှောက်သည်ဟု သတင်းထွက်ပေါ်လာခဲ့ပြီး မြို့ခံများက ဧည့်သည်များအတွက် စိုးရိမ်ပူပန်ခဲ့ရာ ဖုန်းဖြင့်ဆက်သွယ်၍ မိမိဧည့်သည်များကို နေအိမ်သို့ ပြန်လည် ခေါ်ဆောင်ခဲ့ကြပြီး အချို့မှာ ပွဲကျင်းပရာ ရွှေကျင်မြစ်ထဲသို့ သွားရောက် ရှာဖွေခဲ့ကြကြောင်း အဆိုပါ ပွဲတော်သို့ ရောက်ရှိခဲ့သူ ညောင်လေးပင်မြို့ ဘုရားကြီးလမ်းတွင် နေထိုင်သူ အသက် ၃၆ နှစ်အရွယ်ရှိ ဆိုင်ကယ် ရေဆေးသည့်လုပ်ငန်း လုပ်ကိုင်သူ အမျိုးသားတစ်ဦးက ပြောဆိုသည်။

ပဲခူးတိုင်းဒေသကြီး (အရှေ့ခြမ်း) ရွှေကျင်မြို့နယ်လုံးဆိုင်ရာ (၁၆၂) ကြိမ်မြောက် သီတင်းကျွတ် မီးမျှောပွဲနှင့် ရှင်ဥပဂုတ္တမထေရ် ပူဇော်ပွဲကို အောက်တိုဘာလ ၁၈ ရက်နေ့မှ ၂၂ ရက်အထိ ငါးရက်တိုင်တိုင် ယိမ်းအက အလှပြိုင်ပွဲများ၊ ဇာတ်ပွဲများဖြင့် စည်းကားသိုက်မြိုက်စွာ ကျင်းပကြောင်း ပွဲတော်ကျင်းပရေး ကော်မတီအဖွဲ့ထံမှ စုံစမ်းသိရှိရသည်။

The Voice Weekly