ဗြိတိန်အထည်ချုပ်စက်ရုံ ဘီလင်းတွင်ဖွင့်မည်

ဘီးလင်း၊ အောက်တိုဘာ၂၅။

လုပ်သားရွေ့ပြောင်းမှု အများဆုံးပြည်နယ်များတွင် ပါဝင်သည့် မွန်ပြည်နယ် ဘီးလင်းမြို့နယ်၌ အလုပ်အကိုင် ၆၀၀၀ကျော်ခန့် အလုပ်ပေးနိုင် သည့် ဗြိတိန်နိုင်ငံအခြေစိုက် အထည်ချုပ်စက်ကို ၂၀၁၄ခုနှစ်နှစ်ဆန်းပိုင်တွင် ဖွင့်လှစ် သွားမည်ဖြစ်ကြောင်း မွန်ပြည်နယ်ကုန်သည်များနှင့် စက်မှု လက်မှု လုပ်ငန်းရှင်အသင်း ဥက္ကဋ္ဌ ဦးလှရှိန်က People Powerသတင်းစာသို့ ပြောကြားသည်။

“သူတို့တွေက မြေနေရာနဲ့ စက်ရုံတွေကို ဌားရမ်းပြီးသွာပါပြီ။ စက်ရုံဖွင့်ဖို့က သေချာသလောက် ရှိနေပါပြီ” ဟု ဦးလှရှိန်က ထပ်မံအတည်ပြု ပြောကြားသည်။

အထည်ချုပ်စက်ရုံမှ တာဝန်ရှိသူများသည် အလုပ်သမား အသွားအပြန် သယ်ယူပို့ဆောင်ကိုလည်း ဆွေးနွေးလျက် ရှိပြီး ယင်းစက်ရုံ တည် ဆောက်ပြီးပါက အလုပ်အကိုင် ရှားပါးလျက်ရှိသော မွန်ပြည်နယ်ကို အထိုက်အလျောက် အလုပ်အကိုင်များပေးနိုင်မည်ဖြစ်ကြောင်း ဦးလှရှိန်က ဆက်လက်ပြောကြားသည်။

“အလုပ်ပေးနိုင်တဲ့ စက်ရုံတွေသာ ဒီမှာရှိရင် လုပ်အားခနည်း ပေးမယ့် ဘယ်သူကမှ ထိုင်းကိုသွားပြီး လုပ်ချင်မှာမဟုတ်ဘူး” ဟု ၎င်းကဆိုသည်။

မွန်ပြည်နယ်တွင် စက်ရုံ၊ အလုပ်ရုံ ရှားပါးသောကြောင့် အလုပ်ပေးနိုင်မှု နည်းပါကြောင်း၊ ပြည်နယ်ဖွံ့ဖြိုး တိုးတက် အောင်အတွက် စက်ရုံ အလုပ်ရုံများ ပိုမိုဆောက်လုပ်ပေး သင့်ကြောင်း ၎င်းက ထပ်မံပြောကြားသည်။

ယခုနှစ်အတွင်း မွန်ပြည်နယ်သို့ ထိုင်းနိုင်ငံမှ စီးပွားရေး လုပ်ငန်ရှင်များသည် ဟိုတယ်လုပ်ငန်းများ၊ ဆောက်လုပ်ရေး လုပ်ငန်းများ၊ အသေးစား နှင့် အလတ်စားစက်မှုလုပ်ငန်းတို့ကို လာရောက်ရင်းနှီးမြှပ်နှံရန် ပြည်နယ်အစိုးရထံ ခွင့်ပြုချက် တောင်းခံထားပြီး၊ ထိုင်းစီးပွာရေးလုပ်ငန်းရှင်များ လာရောက်
ဆွေးနွေးမှုသည် အများဆုံးဖြစ်ကြောင်း မွန်ပြည်နယ်ကုန်သည် များနှင့် စက်မှုလက်မှုလုပ်ငန်းရှင်များထံမှ စုံစမ်းသိရှိရသည်။

ရေးသားသူ - မင်းသူရ

People power