ဗိုလ်ချုပ်စိုးရှိန်က တောင်သူများကို လက်နက်ကိုင်ကာ ခြိမ်းခြောက်ခဲ့ သည်ဆိုသည့် အမှုကို လာရောက်ညှိနှိုင်းနေ

ပြီးခဲ့သည့် ဇူလိုင်လ ၅ ရက်က ဖြစ်ပေါ်ခဲ့သည့် ဗိုလ်ချုပ်စိုးရှိန်က လက်နက်ကိုင် ခြိမ်းခြောက်ခဲ့သည်
ဆိုမှုနှင့် ပတ်သက်၍ တိုင်ကြားခံရသူ ဗိုလ်ချုပ်စိုးရှိန်ဘက် မှ ဩဂုတ်လ ၁၉ ရက်နေ့က ထုံးဖိုတဲစု
တွင် လာရောက်ညှိနှိုင်းမှုရှိခဲ့သည်ဟု တိုင်ကြားသူဘက်က ပြောသည်။

"သူတို့ဘက်က လာပြီးညှိနှိုင်းတော့ ခြိမ်းခြောက်မှုဖြစ်ခဲ့တဲ့ ထုံးဖိုတဲစု ဒေသခံတောင်သူတွေရဲ့
အကွက်ကို ၀ယ်မယ်။ ဒါပေမဲ့ အမှုကို ပြန်ရုပ်သိမ်း ပေးရမယ်။ နောက်ပြီး ဂျာနယ်တွေမှာ ဖော်ပြ
ထားတာတွေကိုလည်း သတင်းအမှားဆိုပြီး ပြန်ပြင်ခိုင်းတယ်။ ကျွန်တော်တို့ဘက်ကတော့ သူတို့
နောက်ဆုံးတောင်းဆိုထားတာကို လုံးဝသဘောမတူနိုင်ဘူး။ ကျန်တဲ့ အချက်နှစ်ချက်အတွက်
လည်း စဉ်းစားနေတုန်းပဲ။ ဒီကိစ္စအတွက်ကို ဗိုလ်ချုပ် စိုးရှိန်နဲ့ပဲ တိုက်ရိုက်ညှိနှိုင်းချင်တယ်"ဟု
လက်နက်ဖြင့် ခြိမ်းခြောက်ခံရသည်ဆိုသူ ကိုအောင်သန်းဦးက မြန်မာတိုင်း(မ်)ကို ပြောသည်။

တရားလိုနှင့် တိုင်ကြားခံရသူတို့နှစ်ဦး နှစ်ဖက် ညှိနှိုင်းပြီးပြေလည်မှုရရှိခဲ့လျှင် တိုင်ကြားချက်ကို
ပြန်လည်ရုပ်သိမ်းပေး နိုင်သည်ဟု လယ်ဝေးမြို့နယ် မြို့မ ရဲစခန်း မှ စခန်းမှူး ဦးစိုးမင်းသိန်းက
ဩဂုတ်လ ၂၃ ရက်နေ့က မြန်မာတိုင်း(မ်) ကို ပြောသည်။

"ဒါက တရားလို အပေါ်မူတည်ပါတယ်။ သူ့ဘက်နဲ့ ဗိုလ်ချုပ်စိုးရှိန် တို့ဘက်က ညှိနှိုင်းလို့
အဆင်ပြေရင် တရားလိုဘက်က တိုင်ကြားမှုကို ပြန်ရုပ်သိမ်းနိုင်ပါတယ်။ နောက်ပြီး ဒီကိစ္စအတွက်
အမှုဖွင့်ထားခြင်း မရှိသေးပါဘူး။ တိုင်ကြားစာအရ စစ်ဆေးနေဆဲပဲရှိပါသေးတယ်"ဟု ၎င်းက
ပြောသည်။

အဆိုပါ ဒေသခံတောင်သူများ လက်ရှိလုပ်ကိုင်နေသည့် ၃၃၉ ဒသမ ၆၈ ဧကအား ညှိနှိုင်းဈေးဖြင့်
ဝယ်ယူမည်ဟု ဆိုသော်လည်း တောင်သူများဘက်မှလည်း လက်ရှိ လယ်မြေပေါက် ဈေးမှာ
တစ်ဧကလျှင် ခြောက်သိန်းခန့် ရှိနေပြီး ရောင်းမည်ဆိုပါက တစ်ဧကလျှင် ငွေကျပ် ၁၂ သိန်း
တောင်းဆိုထားသည်ဟု ကိုအောင်သန်းဦးက ပြောသည်။

ဇူလိုင်လ ၅ ရက်က လယ်ဝေးမြို့နယ်၊ ပင်သောင်ကျေးရွာအုပ်စုရှိ ထုံးဖိုတဲစုမှ လယ်ယာမြေ ဧက
၅၀၀ ခန့်အတွင်း လက်ရှိလုပ်ကိုင်နေသည့် တောင်သူ ကိုအောင်သန်းဦးနှင့် မခင်တင့် တို့နှစ်ဦးကို
ဗိုလ်ချုပ်မှူးကြီးသန်းရွှေ၏ ကိုယ်ရေးအရာရှိအဖြစ် တာဝန်ယူခဲ့သူ ဗိုလ်ချုပ်စိုးရှိန်က သေနတ်ထုတ်
ခြိမ်းခြောက်ခဲ့သည် ဆိုသည့်ကိစ္စနှင့် ပတ်သက်၍ တိုင်ကြားထားသည့်အမှုကို လယ်ဝေးမြို့နယ်
ရဲတပ်ဖွဲ့က အမှုမဖွင့်ပေးသေးဘဲ မှန်ကန်မှုရှိ၊ ရှိမရှိ တိုင်စာစိစစ်တင်ပြသည့် အဆင့်သာရှိသေး
ကြောင်း သိရသည်။

တိုင်စာ စိစစ်တင်ပြခြင်းဆိုသည်မှာ အမှုလက်ခံဖွင့်နိုင်ရန် တိုင်ကြားသူ၏ တိုင်ကြားချက်မှာ
မှန်ကန်မှု ရှိ၊ မရှိကို အရင်ဆုံး စစ်ဆေးခြင်းဖြစ်ပြီး မှန်ကန်မှု ရှိမှသာ အမှုဖွင့်ပေးခြင်း ဖြစ်သည်ဟု
လယ်ဝေးမြို့နယ် ရဲတပ်ဖွဲ့မှ ဒုရဲအုပ် လှိုင်မိုးဝေက ဩဂုတ်လ ၃ ရက်နေ့က မြန်မာတိုင်း(မ်)ကို
ပြောသည်။

တိုင်ကြားချက်အပေါ် စစ်ဆေးမှုမှာလည်း တရားလိုဘက်မှ သက်သေအားလုံးကို ဩဂုတ်လ
၉ ရက်နေ့က စစ်ဆေးခဲ့ပြီးဖြစ်ပြီး တိုင်ကြားခံရသူ ဗိုလ်ချုပ်စိုးရှိန် ဘက်မှ ကိုလှိုင်ဖြိုးဝင်းကို ယခုလ
ဒုတိယပတ်က စစ်ဆေးပြီး ဖြစ်သည်ဟု သိရသည်။

ထို့ပြင် ခြိမ်းခြောက်ရာတွင် အဓိက ပါဝင်ခဲ့သည်ဆိုသည့် ဗိုလ်ချုပ် စိုးရှိန်ကိုလည်း မကြာမီ စစ်ဆေး
သွားမည်ဖြစ်သည်ဟု သိရသည်။

လက်ရှိတွင် ဗိုလ်ချုပ်စိုးရှိန်သည် ထုံးဖိုတဲစုရှိ လယ်ယာမြေ ဧက ၅၀၀ ကျော်အနက် ၁၆၀ ဒသမ
၃၂ ဧကကို အမည်ပေါက်ဖြင့်ပိုင်ဆိုင်ထားပြီး ယင်းမြေပေါ်တွင် ထုံးဖုတ်ခြင်းနှင့် မီးသွေးဖုတ်ခြင်းများ လုပ်ကိုင်လျက်ရှိသည်ဟု ဒေသခံတောင်သူများက ပြောသည်။

ပြည့်သက်ဖြိုး  (မြန်မာတိုင်းမ်)