ကျောက်ဖြူမှာ ဓါတ်ငွေ့ပိုက်လိုင်းကြောင့် နစ်နာမှုတွေဖြေရှင်းပေးဖို့ ကျေးရွာ ၃၀ ကျော် တောင်းဆို

ရခိုင်ပြည်နယ် ကျောက်ဖြူမြို့နယ်အတွင်းမှာ ရွှေသဘာဝဓာတ်ငွေ့ ပိုက်လိုင်းစီမံကိန်းကြောင့် ထိခိုက်နစ်နာမှုတွေကို ဖြေရှင်းပေးဖို့ ကျေးရွာပေါင်း ၃၀ ကျော်က အချက် ၅ ချက်ပါတဲ့ တောင်းဆိုချက်တွေကို ဒီနေ့ရက်စွဲနဲ့ ကျောက်ဖြူခရိုင် အာဏာပိုင်တွေဆီ စာရေးသားတောင်းဆိုလိုက်ပါတယ်။

ဒီဓာတ်ငွေ့ပိုက်လိုင်းကြောင့် ထိခိုက်နစ်နာနေရတဲ့ ရွာ ၃၀ ထဲက ဒေသခံ ဦးမောင်အေးက RFA ကို အခုလို ပြောပါတယ်။

“ကျနော်တို့ မြို့နယ်အုပ်ချုပ်ရေးမှူးရုံးကိုတင်တယ်၊ ခရိုင်အုပ်ချုပ်ရေးမှူးရုံးကိုတင်တယ်၊ နောက်ကျောက်ဖြူမှာရှိတဲ့ ပါတီတွေကို မိတ္တူပို့ခဲ့တယ်၊ ကျနော်တို့တောင်းဆိုချက်ကို စာစပြီးတင်တဲ့ရက်ကစပြီး ၁၅ ရက်အတွင်းမှာပေါ့ တုန့်ပြန်ဖြေရှင်းပေးဖို့ တောင်းဆိုထားတယ်ခင်ဗျ”

ဒီကနေ့ပေးပို့တဲ့စာကို ကြတ္တိန်၊ သပြုတောင်၊ မင်းပြင်၊ ချောင်းဝ၊ သဖန်းချောင်း၊ လိပ်ခမော်၊ ကုလားကျွန်း၊ ကပိုင်ချောင်း စတဲ့ကျေးရွာပေါင်း ၃၀ ကျော်က ကိုယ်စားလှယ်တွေနဲ့ ဖွဲ့စည်းထားတဲ့ ဒေသဖွံ့ဖြိုးရေးကော်မတီက လက်မှတ်ရေးထိုး ပေးပို့ခဲ့တယ်လို့ သိရပါတယ်။
အဲဒီအချက် ၅ ချက်ကတော့ ကျေးလက်စာသင်ကျောင်း၊ ဆေးပေးခန်း၊ သောက်သုံးရေရရှိဖို့၊ ကျေးရွာချင်းဆက်လမ်းတွေ ဖောက်လုပ်ပေးဖို့နဲ့ လျှပ်စစ်မီးရရှိရေးအတွက် မဖြစ်မနေဆောင်ရွက်ပေးဖို့ တွေပါဝင်တယ်လို့သိရပါတယ်။

ဒီတောင်းဆိုချက်တွေကို ကျောက်ဖြူမှာအခြေစိုက်နေတဲ့ ဒေဝူးကုမ္ပဏီနဲ့ မြန်မာအစိုးရပိုင် မြန်မာ့ရေနံနဲ့ သဘာဝဓာတ်ငွေ့လုပ်ငန်း MOGE တာဝန်ခံတွေကို သွားရောက်ပေးပို့ရာမှာ လက်ရှိတာဝန်ရှိသူတွေက ဒေသအာဏာပိုင်တွေနဲ့သာ သက်ဆိုင်တယ်ဆိုပြီး လက်ခံဖို့ငြင်းဆန်ခဲ့တယ်လို့လည်းဆိုပါ တယ်။

ဒီတောင်းဆိုချက်တွေကို သက်ဆိုင်ရာ အာဏာပိုင်အဆင့်ဆင့်ကို ဆက်လက်တင်ပြတောင်းဆိုသွားဖို့ စီစဉ်နေတယ်လို့လည်း သိရပါတယ်။

RFA Burmese