ဒုတိယဗိုလ်ချုပ်ကြီးမြင့်စိုးကို ရဲချုပ်မှူးကြီး တာဝန်ပေးရန် သတင်းထွက်

ရန်ကုန်၊ ဇူလိုင် ၁၇

ကာကွယ်ရေးဦးစီးချုပ်ရုံး(ကြည်း)မှ ဒုတိယဗိုလ်ချုပ်ကြီးမြင့်စိုးကို ရဲချုပ်မှူးကြီး ရာထူးဖြင့်မြန်မာနိုင်ငံရဲတပ်ဖွဲ့အား ကြီးကြပ်ကွပ်ကဲရန် တာဝန်ပေးအပ်မည်ဖြစ်ကြောင်း တပ်မတော်ထိပ်ပိုင်းအရာရှိကြီးများနှင့်နီးစပ်သူများထံမှသတင်းရရှိသည်။

ဒုတိယဗိုလ်ချုပ်ကြီးမြင့်စိုးကို ရဲချုပ်မှူးကြီးတာဝန်ပေးအပ်ရန်အတွက် အစိုးရအဖွဲ့အစည်းအဝေးတွင် ဆွေးနွေးခြင်းရှိ၊ မရှိ၊ အစိုးရအနေဖြင့်လည်း သဘောတူ ခန့်အပ်ရန် စီစဉ်ထားခြင်းရှိ၊ မရှိကို သမ္မတရုံးနှင့် အစိုးရအဖွဲ့သို့ ဆက်သွယ်၍ မြန်မာသံတော်ဆင့်က မေးမြန်းခဲ့ရာ

““ ဗိုလ်ချုပ်ကြီးမြင့်စိုးကို ရဲချုပ်မှူးကြီး ပေးရင်ကောင်းတာပေ့ါ။  ဒီနေ့ ရဲနဲ့လုပ်ရမှာလေဗျာ။ ရဲတပ်ဖွဲ့က အားနည်းတယ်။ လုပ်သင့်ပါတယ်။ လုပ်ရမှာ ကြာနေပြီ။ ကျွန်တော်တို့တော့လုပ်ရမှာပဲ။ သူများနိုင်ငံတွေမှာတော့ရှိတယ်လေ။ တပ်ကလူတွေလည်း အဲဒီိထည့်ရမှာပဲ။ အဲဒီရောက်ပြီးမှ အကုန်ပျက်မသွားဖို့ပဲလိုတယ်”” ဟု ပြည်ထောင်စုဝန်ကြီးတစ်ဦးက ပြောသည်။

ဒုတိယဗိုလ်ချုပ်ကြီးမြင့်စိုးသည် တပ်မတော်တွင် နယက အစိုးရလက်ထက်၌ ကျောင်းအုပ်ကြီး၊ တိုင်းမှူး၊ ရာထူး တာဝန်များကို အဆင့်ဆင့် ထမ်းဆောင်ခဲ့ပြီး ယခုအခါတွင် ဒုတိယဗိုလ်ချုပ်ကြီး အဆင့်ဖြင့် ကာကွယ်ရေးဦးစီးချုပ်ရုံး (ကြည်း) ၌ တာဝန်ထမ်းဆောင်လျက်ရှိကာ ပြည်ထောင်စုဝန်ကြီးဦးအောင်မင်းတို့နှင့် အတူ ငြိမ်းချမ်းရေးဆွေးနွေးပွဲများ၌ တပ်မတော်ကိုယ်စား အမြင့်ဆုံးအာဏာပိုင်အနေဖြင့် ပါဝင်ဆွေးနွေး လျက်ရှိသည်။

မြန်မာနိုင်ငံရဲတပ်ဖွဲ့ကို နယက အစိုးရ လက်ထက်တွင် ပြည်ထဲရေးဝန်ကြီး ဗိုလ်မှူးကြီးတင်လှိုင် တာဝန်ယူစဉ်ကစ၍ အထူးတလည်ပြောင်းလဲမှုများ၊ ဖွဲ့စည်းမှုများ၊ ၀တ်စုံများပြောင်းလဲမြှင့်တင်ခဲ့ပြီးနောက် သမ္မတဦးသိန်းစိန်၏ အစိုးရသစ် လက်ထက်တွင် ရဲချုပ်ကျော်ကျော်ထွန်းကို  ပြည်ထဲရေးဒုဝန်ကြီးအဆင့်ပေး၍ ဖွဲ့စည်းမှုကို မြှင့်တင်ခဲ့သည်။ နယက အစိုးရ လက်ထက်က ရဲချုပ်တာဝန်ယူခဲ့သော ဗိုလ်မှူးချုပ်ခင်ရီသည် ယခုအခါ လ၀ကပြည်ထောင်စုဝန်ကြီး တာဝန်ယူပြီးနောက် ယခုအစိုးရသစ်လက်ထက် ပြည်ထဲရေးဝန်ကြီးမှာ ဒုတိယဗိုလ်ချုပ်ကြီးကိုကိုဖြစ်သည်။

မြန်မာနိုင်ငံ ရဲတပ်ဖွဲ့ဖွဲ့စည်းပုံအရ ပြည်ထဲရေးဝန်ကြီးလက်အောက်တွင်ရှိ၍ အမြင့်ဆုံး ရဲအာဏာပိုင်မှာ ရဲချုပ်(ပြည်ထဲရေးဒုဝန်ကြီး)ဖြစ်ပြီး ဒုတိယရဲချုပ်၊ ရဲဦးစီးအရာရှိချုပ်၊ ရဲရေးချုပ်၊ ရဲထောက်ချုပ်၊ ရဲတပ်ရင်းကွပ်ကဲရေးမှူး၊ မှုခင်းတပ်ဖွဲ့မှူး၊ သတင်းတပ်ဖွဲ့မှူးစသည်တို့မှာ တပ်မတော်မှ အရာရှိကြီးများကို ရဲမှူးချုပ်အဆင့်ဖြင့် တာဝန်ထမ်းဆောင်စေလျက်ရှိကာ ရဲချုပ်ရုံးတွင် ဌာနအလိုက် ညွှန်ကြားရေးမှူးများ၊ တိုင်းဒေသကြီးနှင့် ပြည်နယ် ရဲတပ်ဖွဲ့မှူးများ၊ ခရိုင်နှင့် မြို့နယ်ရဲတပ်ဖွဲ့မှူးများဖြင့် အဆင့်ဆင့်ဖွဲ့စည်းထားသည်။

by Myanmartandawsint Newspaper