ထားဝယ် စီမံကိန်းမှ အီတာလျံ-ထိုင်း နုတ်ထွက်မည့် သတင်းများထွက်

ထားဝယ်၊ နိုဝင်ဘာ ၁၇

မြန်မာနိုင်ငံ၏ အရေးကြီးသော ရေနက် ဆိပ်ကမ်းနှင့် အထူးစီးပွားရေးဇုန် တည်ဆောက်ရေး စီမံကိန်း တစ်ခုဖြစ်သည့် ထားဝယ် ရေနက်ဆိပ်ကမ်း စီမံကိန်း ကနဦး လုပ်ကိုင်ခွင့်ရ အီတာလျံ-ထိုင်း (ITD) ကုမ္ပဏီ စီမံကိန်းမှ နုတ်ထွက်မည် ဆိုသည့် သတင်းများ ယခုရက်ပိုင်းအတွင်း ထွက်ပေါ်လျက် ရှိကြောင်း ထားဝယ်ဒေသခံ အချို့နှင့် အဆိုပါ စီမံကိန်းတွင် လုပ်ကိုင်နေသူများက ပြောကြားသည်။

ထားဝယ် စီမံကိန်းကို အကောင်အထည်ဖော် ဆောင်ရွက်နေသည့် အီတာလျံ-ထိုင်း ကုမ္ပဏီ (ITD) သည် နိုဝင်ဘာလ ၂၀ ရက်နေ့မှစပြီး နဘုလယ်ရှိ မြေပြင် လုပ်ငန်းခွင်မှ စတင်ထွက်ခွာတော့မည် ဖြစ်ကြောင်း ကုမ္ပဏီ ဝန်ထမ်းများနှင့် နဘုလယ် ဒေသခံများ အကြား၌ သတင်းထွက်ပေါ်လျက် ရှိသည်။
“ထိုင်းနိုင်ငံသား ဝန်ထမ်းတွေက ၂၁ ရက်နေ့မှာ ပြန်ရတော့မယ် လို့ ပြောတယ်။ ၂၀ ရက်နေ့မှာ ITD ထွက်တော့မယ်လို့တော့ ကြားနေရတယ်။ တရားဝင်တော့ အသိမပေးသေးဘူး” ဟု ITD ရုံး၌ တာဝန်ထမ်းဆောင် နေသည့် ထိန်ကြီးကျေးရွာမှ ဝန်ထမ်းတစ်ဦးက ဆိုသည်။

၂၀၀၈ ခုနစ်တွင် မြန်မာနိုင်ငံ အစိုးရနှင့် နားလည်မှု စာချွန်လွှာ ရေးထိုးပြီးနောက် လုပ်ငန်း အကောင်အထည်ဖော် ဆောင်ရွက် ခဲ့သော ITD ကုမ္ပဏီသည် ထားဝယ် - ကန်ချနပူရီ လမ်းအူကြောင်း ဖောက်လုပ်ခြင်း၊ ရွှေ့ပြောင်း နေရာ ချထားပေးမည့် ဒေသခံများ နေထိုင်ရာအတွက် ဘဝမြို့သစ် စီမံကိန်း တည်ဆောက်ခြင်း၊ တလိုင်းသတ်တောင် ကျောက်ထုတ်လုပ်ရေးစခန်း တည်ဆောက်ခြင်း၊ ဆိပ်ကမ်းငယ် တည်ဆောက်ခြင်း စသော လုပ်ကွက်များကို လုပ်ဆောင်နေသည်။
“ကုမ္ပဏီက ထွက်တော့မယ်လို့တော့ ကြားနေရတယ်။ လုပ်ကွက် ထဲမှာတော့ ဘာမှအသံ မကြားရဘူး” ဟု ကျောက်ထုတ်လုပ်ရေးစခန်း လုပ်ကွက်မှ ဝန်ထမ်းတစ်ဦးက ဆိုသည်။

ယင်းသို့ ထားဝယ် စီမံကိန်းမှ ITD ကုမ္ပဏီမှ ထွက်ခွာမည်ဟု သတင်းထွက်ပေါ်နေ၍ အတည်ပြုချက် ရယူရန် ITD ကုမ္ပဏီရုံးသို့ တယ်လီဖုန်းဖြင့် ဆက်သွယ် မေးမြန်းရာ အစိုးရချင်း အကောင်အထည် ဖော်သည့် စီမံကိန်း ဖြစ်နေသောကြောင့် အထောက်အကူပြု ရုံးကို မေးမြန်းပါဟု ပြန်လည် ဖြေကြားခဲ့သည်။

အထောက်အကူပြု ရုံးမှ တာဝန်ရှိသူ တစ်ဦးကို ဆက်လက်၍ မေးမြန်းရာ ITD ဘက်မှ တရားဝင် အကြောင်းကြားလာခြင်း မရှိသေး၍ ITD ကိုသာ မေးမြန်းပါဟု ပြန်လည် ဖြေကြားခဲ့သည်။

ထိုင်းနှင့် မြန်မာအစိုးရချင်း လုပ်ဆောင်သော စီမံကိန်းအဖြစ် အသွင်ပြောင်းပြီးနောက် ကနဦး လုပ်ကိုင်ခွင့်ရ ITD မှာ ထားဝယ် စီမံကိန်းမှ နောက်ဆုတ်မည် ဖြစ်ကြောင်း မြန်မာအစိုးရ တာဝန်ရှိသူ တစ်ဦးက ယခုနှစ်လယ်ပိုင်းက ပြောဆိုထားသည်။

ITD ၏ ထားဝယ် စီမံကိန်း လုပ်ကိုင်ခွင့်များကို မြန်မာအစိုးရက ရုပ်သိမ်းတော့မည်ဟု ထိုင်း စွမ်းအင်ဝန်ကြီးက မှတ်ချက်ပြု ပြောဆိုမှုနှင့် ပတ်သက်၍ ITD က အံ့အားသင့်ရကြောင်း ပြောဆိုခဲ့ပြီး မြန်မာအစိုးရ၏ တိုက်ရိုက် ပြောဆိုချက် တစ်စုံတစ်ရာ မရသေးကြောင်း ဆိုခဲ့သည်။

ထိုကိစ္စနှင့် ပတ်သက်၍ ခုခံရင်ဆိုင်သွားရန် အသင့်ရှိကြောင်း ITD ၏ ပြောဆိုချက်ကို ဘန်ကောက် ပို့စ်သတင်းစာ၏ နိုဝင်ဘာ ၁၇ ရက် အွန်လိုင်း သတင်းတွင် ဖော်ပြထားသည်။
“ITD ကုမ္ပဏီ ထွက်တော့မယ် ဆိုရင် ဒီလို ထွက်သွားခိုင်းလို့တော့ မရဘူး။ သူတို့ကြောင့် ထိခိုက်နစ်နာမှု ရှိတာကိုတော့ တာဝန်ယူခိုင်းရမယ်” ဟု ပရဒတ် ကျေးရွာမှ ဥယျာဉ်ခြံ ပိုင်ရှင် ဦးထိန်ဝင်းက ပြောသည်။

စီမံကိန်း ဧရိယာအတွင်း ပရဒတ်ကျေးရွာ နယ်နိမိတ်ရှိ တလိုင်းသတ်တောင် ကျောက်ထုတ်ရေး စခန်းကြောင့် ထိခိုက်မှုရှိသော လယ်ယာဥယျာဉ် ခြံမြေ လုပ်ကိုင်သူ ၁၀ ဦးကလည်း လျှော်ကြေး ရရှိရေးအတွက် တောင်းဆို ထားသည်ဟု ယင်းလယ်သမားများထံမှ သိရသည်။

ကျောက်ထုတ်ရေးစခန်း အပါအဝင် အခြားလုပ်ကွက် တစ်ခုကို ထားရစ်ခဲ့ကာ စီမံကိန်းမှ ဆုတ်ခွာမည် ဖြစ်ကြောင်း၊ ထိုင်းနိုင်ငံသား အားလုံး ပြန်ရမည် ဖြစ်ပြီး မြန်မာဝန်ထမ်းများသာ ကျန်ခဲ့မည်ဟု သိထားကြောင်း ITD ကုမ္ပဏီဝန်ထမ်း တစ်ဦးက ရှင်းပြသည်။

Dawei Watch

The Voice Weekly