ဘုရင့်နောင်လမ်းမကြီးတွင် အမျိုးသမီးကြီးတစ်ဦးကို ကုန်ကားတိုက်ပြီး မောင်းပြေး

ဘုရင့်နောင်လမ်းမကြီးပေါ် ဘုရင့်နောင်ကုန်စည်ဒိုင် ၀င်ပေါက်တွင် လမ်းဖြတ်ကူးနေသည့် အမျိုးသမီးကြီးတစ်ဦးကို ကုန်တင်ကားတစ်စီးက ၀င်တိုက်ပြီး မောင်းပြေးသွားကြောင်း သတင်းရရှိသည်။

မရမ်းကုန်းမြို့နယ်၊ ဘုရင့်နောင်လမ်းမကြီးပေါ်တွင် နိုဝင်ဘာ ၁၆ ရက် ညနေ ၄ နာရီခန့်က ယောဂီဝတ်စုံဝတ်ဆင်ထားသည့် အမျိုးသမီးကြီးတစ်ဦးသည် ကားလမ်းဖြတ်ကူးစဉ် ဘုရင့်နောင်တံတား ချဉ်းကပ်လမ်းအတိုင်း မောင်းလာသည့် အမျိုးအစားမမှတ်မိလိုက်သည့် ယာဉ်တစ်စီးက ၀င်တိုက်မိကာ မောင်းပြေးသွားကြောင်း အနီးရှိ မျက်မြင်တွေ့ရှိသူများက ပြောသည်။

““အသက် ၄၀ လောက်ရှိမယ့် ယောဂီရောင်ဝတ်စုံဝတ်ထားတဲ့ အမေကြီးတစ်ဦးကို တိုက်သွားတာ။ ပေါင်က သွေးတွေအများကြီးထွက်နေတယ်။ ကားတိုက်မိမိချင်း သူက မအော်ဘဲ လမ်းလယ်တုံးဘေးမှာ ငုတ်တုတ်ကြီးထိုင်နေတယ်။ ကားက မောင်းပြေးသွားတယ်။ လမ်းကူးတဲ့လူတစ်ယောက်ကတွေ့လို့ အော်ပြေးတော့မှ သိရတယ်”” ဟု အဆိုပါယာဉ်တိုက်မှုဖြစ်စဉ်အနီးတွင် ရှိသောအမျိုးသားတစ်ဦးက ပြောသည်။
ယာဉ်တိုက်ခံရသူ အမျိုးသမီးကြီးသည် ဒဂုံမြို့သစ်မြောက်ပိုင်းမြို့နယ်တွင် နေထိုင်သည့် အသက် ၄၉ နှစ်အရွယ် ဒေါ်တင်တင်ဦးဖြစ်ပြီး ဘုရင့်နောင်ပွဲရုံတန်းသို့ အဖော်မပါဘဲ တစ်ဦးတည်းရောက်လာခြင်းဖြစ်သည်။

““ယာဉ်တိုက်မှုဖြစ်လို့ အရေးပေါ်ကိုရောက်လာပြီး ပေါင်ကြေနေလို့ အရိုးဆောင်ကို ပို့ထားပါတယ်”” ဟု အင်းစိန်ပြည်သူ့ဆေးရုံကြီးမှ တာဝန်ကျ ဆေးရုံဝန်ထမ်းတစ်ဦးက ပြောသည်။

ယာဉ်တိုက်မှုကျူးလွန်မိသည့်ကားမှာ မောင်းနှင်ထွက်ပြေးသွား၍ ဖမ်းမိခြင်းမရှိသေးကြောင်း သတင်းရရှိသည်။ ဘုရင့်နောင်တံတားတည်ဆောက်ရေး လုပ်ငန်းခွင်အနီးတွင် မကြာခဏ ယာဉ်တိုက်မှုဖြစ်ကာ သေဆုံးမှုနှင့် ဒဏ်ရာရရှိမှုများ ငါးမှုခန့်ဖြစ်ပွားခဲ့ကြောင်း မှုခင်းမှတ်တမ်းများအရ သိရသည်။

၂၀၁၃ ခုနှစ် ဇန်န၀ါရီလမှ အောက်တိုဘာလအထိ ၁၀ လတာအတွင်း ရန်ကုန်တိုင်းဒေသကြီးတွင် ယာဉ်တိုက်မှုပေါင်း ၂၃၀၀ ကျော် ဖြစ်ပွားခဲ့သည်။ ယာဉ်တိုက်မှုကြောင့် လူ ၃၀၀ ကျော် သေဆုံးပြီး ဒဏ်ရာရသူ ၃၅၀၀ နီးပါး ရှိခဲ့သည်။ ထို့ကြောင့် တစ်လလျှင် ပျမ်းမျှ ယာဉ်တိုက်မှု ၂၃၀ ကျော် ဖြစ်ပွားပြီး တစ်နေ့လျှင် ခုနစ်မှုနှုန်းဖြစ်ပွားကာ တစ်ယောက်နှုန်း သေဆုံးနေသည်။

ရန်ကုန်တိုင်းဒေသကြီးတွင် အောက်တိုဘာတစ်လတည်း ယာဉ်တိုက်မှု ၂၈၅ မှု ဖြစ်ပွားကာ သေဆုံးသူ ၄၆ ဦးနှင့် ဒဏ်ရာရသူ ၄၄၈ ဦး ရှိခဲ့သည်။ ယင်းအမှုများတွင် ရန်ကုန်တိုင်း စည်ပင်သာယာနယ်နိမိတ်အတွင်း ယာဉ်တိုက်မှု ၂၁၄ မှု ရှိပြီး သေဆုံးသူ ၂၉ ဦးနှင့် ဒဏ်ရာရရှိသူ ၃၁၁ ဦး ရှိခဲ့ကြောင်း ရန်ကုန်တိုင်းဒေသကြီး ရဲတပ်ဖွဲ့၏ မှုခင်းမှတ်တမ်းများအရ သိရှိရသည်။

ယာဉ်တိုက်မှုဖြစ်၍ လူသေဆုံးလျှင် ပြစ်မှုကျူးလွန်သူသည် ပြစ်မှုဆိုင်ရာ ပုဒ်မ ၃၀၄ (က) အရ ထောင်ဒဏ် ခုနစ်နှစ်အထိ ကျခံနိုင်သည့်အပြင် ငွေဒဏ်လည်း ချမှတ်နိုင်သည်။

7day Daily