တန်ဆောင်တိုင် မီးပုံးပျံပွဲတော်ဖွင့်ပွဲ ယမန်နှစ်ထက် ဧည့်သည်ဝင်ရောက်မှု များပြား

နှစ်စဉ် တန်ဆောင်မုန်းလရောက်တိုင်း ကျင်းပမြဲဖြစ်သည့် ရှမ်းပြည်နယ်၊ တောင်ကြီးမြို့ တန်ဆောင်တိုင် မီးပုံးပျံပွဲဖွင့်ပွဲသို့ ယမန်နှစ်ထက် ခရီးသွားဧည့်သည်များ လာရောက်ကြည့်ရှုမှုများပြားခဲ့ကြောင်း မီးပုံပျံ ကျင်းပရေးကော်မတီ အတွင်းရေးမှူးဦးတင်ဝင်းက ပြောသည်။

““လွတ်လပ်ရေးမရခင်အချိန်ကတည်း ရဲဂတ်တဲပွဲဆိုပြီး ရဲစခန်းမှာ စတင်ကျင်းပဲ့ခြင်း ဖြစ်ပါတယ်။ နောက်ပိုင်း မြို့နယ်ဓမ္မာရုံကို ပြောင်းရွှေ့ပြီး ရှမ်းရိုးရာထင်းရှူးမီးတိုင်တွေလုပ်ပြီး ဘုရားမီးပူဇော်ပွဲတွေ လုပ်တယ်။ နောက်ပိုင်း မီးပုံးပျံအငယ်လေးတွေ လွှတ်တင်ရာက မီးပုံးပျံအကြီးတွေ ပြုလုပ်လာခဲ့ခြင်း ဖြစ်ပါတယ်”” ဟု တန်ဆောင်တိုင်မီးပုံးပျံပြိုင်ပွဲ စတင်ဖြစ်ပေါ်လာပုံကို အတွင်းရေးမှူးက ပြောသည်။
ယခုနှစ် တန်ဆောင်တိုင် မီးပုံးပျံပြိုင်ပွဲဝင် မီးပုံးပျံညလွှတ်မီးကြီး ၆၈ လုံးနှင့် စိန်နားပန်မီးပုံး ၃၄ လုံး ၀င်ရောက်ယှဉ်ပြိုင်မည်ဖြစ်ပြီး နေ့လွှတ်အရုပ်မီးပုံးပျံ ၃၈၆ လုံး ယှဉ်ပြိုင်မည် ဖြစ်သည်။

မီးပုံးပျံကွင်း လုံခြုံရေးကို ယခင်နှစ်များထက် တိုးမြှင့်ချထားပြီး ကွင်းအနီးပတ်ဝန်းကျင်တွင် မီးသတ်ကားကိုးစီး ချထားကြောင်း ယမ်းခွေစိစစ်ရေးအဖွဲ့ မီးသတ်မှ ဒုတပ်ရင်းမှူးဦးတင့်ဆွေက ဆိုသည်။
ပြိုင်ပွဲဝင် မီးပုံးပျံများအနက် ပထမဆုမှ ပဉ္စမဆုအထိ ဆုရွေးချယ်ပေးအပ်ပြီး ပထမဆုရသည့်အဖွဲ့အား ကျပ် ၄၅ သိန်း၊ ဒုတိယသိန်း ၄၀ နှင့် တတိယ ၃၅ သိန်း စသဖြင့် သတ်မှတ်၍ ဆုများပေးသည်။ စိန်နားပန်မီးပုံးပျံများကို ပထမဆုအနေဖြင့် ၁၅ သိန်း မှ စတင်၍ ပဉ္စမဆု ၆ သိန်းအထိ ပေးခြင်းများရှိသည်ဟု ပွဲကော်မတီမှ ထုတ်ပြန်သည်။

 7DAY DAILY