Home » » တာချီလိတ်တွင် အိုက်စ် မူးယစ်ဆေး အလေးချိန် ၇ တန်ဖမ်းမိ

တာချီလိတ်တွင် အိုက်စ် မူးယစ်ဆေး အလေးချိန် ၇ တန်ဖမ်းမိ

Written By Unknown on Tuesday, October 8, 2013 | 6:19 PM

၈ အောက်တိုဘာလ ၂၀၁၃

တာချီလိတ်မြို့နယ် တာလေမြို့နယ်ခွဲတွင် အိုက်စ် (ice or crystal methamphetamine) မူးယစ်ဆေးအမျိုးအစား ၇ တန် ထက်မနည်းဖမ်းရမိကြောင်း နီးစပ်သည့်သတင်းရပ်ကွက်ကပြောပါသည်။

အောက်တိုဘာ ၃ ရက် ညနေ ၄ နာရီခန့်တွင် ပါလျောင်း - ကျိုင်းလပ်မှ လာသည့် ကားတစီးအား မိုင်းလျဲန်းရဲတပ်ဖွဲ့ တားစီးစစ်ဆေးရာမှာ အိုက်စ် မူးယစ်ဆေးတုံးများ ဖမ်းဆီးရမိခြင်းဖြစ်ကြောင်း အမည်မဖေါ်လိုသူ ကုန်သည်တဦးက ပြောပါသည်။

“ပြီးခဲ့တဲ့ အပတ်ထဲက မြန်မာအာဏာပိုင်တွေက ဖမ်းမိတာ။ ပါလျောင်း- ကျိန်းလပ်ဘက်ကလာတဲ့ မူးယစ်ဆေးချက်ဖို့ ရေခဲ တုံးလိုဟာမျိုးပေါ့။ ၇ တန်လောက်ရှိတယ်။ အဲဒီအမျိုးအစားက ၁ ကီလို ဘတ် ၅ သိန်းရောင်းတယ်။ ဒေသအတွင်းပြည်သူ့ စစ်တပ်ဖွဲ့တဖွဲ့ရဲ့ ပစ္စည်းတွေ လို့ပြော တာဘဲ။ သယ်ဆောင်လာတဲ့ လူ ၃ ယောက်ကိုလဲ အာဏာပိုင်တွေဖမ်းထားတယ်။ စိုင်းနွဲ့ စိုင်းဆု နဲ့ စိုင်းဟောင်တဲ့” ဟု တာလေဒေသခံ လုံးနန်ဒီး ကပြောသည်။

အဆိုပါ ဖမ်းဆီးရမှုအား အိုက်စ် မူးယစ်ဆေးတုံး ၇ တန်မဟုတ်ဘဲ မူးယစ်ဆေးဝါးချက်လုပ်သည့် ဓါတုဆေးရေများသာ ဖြစ်ကြောင်း တပ်မတော်ထောက်လှမ်းရေးတပ်ဖွဲ့ သတင်းရပ်ကွက်ကလည်းအတည်ပြုပြောဆိုသည်။

အဆိုပါ သယ်ဆောင်သူ ၃ ဦးမှာ မြန်မာစစ်တပ် ခလရ ၅၇၁ နှင့် ၅၇၂ တို့ထံတွင် ရံပုံငွေထည့်သွင်း နားလည်မှုရယူသဖြင့် ယခင်က လွတ်လွတ်ကင်းကင်း သယ်ယူနိုင်ခဲ့ကြောင်း၊ သို့သော် ယခုမှာမူ အပေးအ ယူမျှတမှုမရှိသည့်အတွက် သတင်း ပေါက်ကြားကာ မိုင်းလိန်းရဲတပ်ဖွဲ့မှ ဖမ်းဆီးလိုက်ခြင်းဖြစ်ကြောင်း ကိုယ်တိုင်မြင်တွေ့ရသည့် ပြည်သူစစ်တပ်ဖွဲ့ ဝင်လားဟူအမျိုးသားတဦး ကပြောသည်။

ယခုအခါအဆိုပါ ၃ ဦးအား ရဲများက စစ်ဆေးမှုပြုလုပ်နေကြောင်းလည်း တာလေဒေသခံ နန်းနွန်းက ပြောဆိုပါသည်။

သျှမ်းသံတော်ဆင့်