အုပ်ချုပ်ရေးအာဏာပိုင်တွေ တိတိကျကျ ပြောဆိုကြဖို့ သူရ ဦးရွှေမန်း တိုက်တွန်း

ပြည်နယ်အုပ်ချုပ်ရေး တာဝန်ရှိသူတွေအနေနဲ့ ပြည်သူတွေရဲ့ မေးမြန်းချက်တွေကို ဖြေဆိုတဲ့အခါမှာ ယေဘူယျဆန်တဲ့ စကားမျိုးမပြောပဲ တိတိကျကျ ကတိပေးနိုင်တဲ့ စကားမျိုးကိုသာပြောဆိုဖို့ ပြည်ထောင်စု လွှတ်တော်နာယက သူရဦးရွှေမန်းက ဒီကနေ့ တိုက်တွန်းလိုက်ပါတယ်။

ဒီနေ့ လားရှိုးမြို့မှာ ပြည်ထောင်စု လွှတ်တော်နာယက သူရဦးရွှေမန်းနဲ့ ဒေသခံလူထု တွေ့ဆုံရာမှာ ဒေသခံတစ်ဦးက ဒေသအတွင်း မူးယစ်ဆေးဝါး ရောင်းဝယ်သုံးစွဲနေတာတွေနဲ့ ပတ်သက်ပြီး မေးမြန်းခဲ့တဲ့အပေါ် ရှမ်းပြည်နယ်ဝန်ကြီးချုပ်က ဦးစပ်အောင်မြတ် ဖြေကြားတဲ့အခါမှာ ယေဘူယျသဘောဆောင်နေတဲ့အတွက် အခုလိုသတိပေးခဲ့တာဖြစ်တယ်လို့ ဆွေးနွေးပွဲတက်ရောက်ခဲ့တဲ့ သီပေါမြို့နယ် ပြည်သူ့လွှတ်တော်ကိုယ်စားလှယ် ဦးရဲထွန်းက RFA ကိုပြောပါတယ်။

ဒါ့အပြင် ဒီနေ့ဆွေးနွေးပွဲမှာ ဒေသခံတွေက တိုင်းရင်းသားလက်နက်ကိုင် အဖွဲ့အစည်းတွေနဲ့ ငြိမ်းချမ်းရေးတည်ဆောက်မှု အခြေအနေတွေ၊ ဒေသအတွင်း ဘိန်းစိုက်ပျိုးထုတ်လုပ်မှုကိစ္စတွေ၊ တရုပ်မြန်မာနယ်စပ်ကုန်သွယ်ရေး အခြေအနေတွေနဲ့ ပတ်သက်ပြီး မေးမြန်းချက်တွေကို သက်ဆိုင်ရာ အုပ်ချုပ်ရေးတာဝန်ရှိသူတွေက ပြန်လည်ဖြေကြားခဲ့တယ်လို့ သိရပါတယ်။

ပြည်ထောင်စု လွှတ်တော်နာယက သူရဦးရွှေမန်းနဲ့အဖွဲ့ဟာ ရှမ်းပြည်နယ်မြောက်ပိုင်းကို ရောက်ရှိနေချိန်မှာ ဝ ပြည်သွေးစည်းညီညွတ်ရေး တပ်မတော် UWSA တပ်ဖွဲ့အပါအ၀င် အမျိုးသားဒီမိုကရက်တစ် မဟာမိတ်တပ်မတော် (NSAA-ESS) မိုင်းလားတပ်ဖွဲ့က ခေါင်းဆောင်တွေနဲ့ ပြီးခဲ့တဲ့ စက်တင်ဘာလ ၃ ရက်နေ့က ကျိုင်းတုံမြို့မှာ တွေ့ဆုံခဲ့ကြပါသေးတယ်။

RFA Burmese