ကိုယ်စားလှယ်အဖြစ်မှရုပ်သိမ်းခွင့် လွှတ်တော်တွင်းအင်အားစုအချို့စိုးရိမ်

“လွှတ်တော်ကိုယ်စားလှယ်တာဝန်မှ ပြန်လည်ရုပ်သိမ်းခြင်းဆိုင်ရာ ဥပဒေကြမ်းကို ပြဋ္ဌာန်းရန် စိုးရိမ်ကြောင့်ကြစရာမလိုဘဲ ကျွန်တော်တို့နိုင်ငံနှင့် နိုင်ငံသားများအတွက် လွှတ်တော်သက်တမ်းကာလ တစ်ဝက်ကျော် ရောက်ရှိလာပြီဖြစ်သည့်အတွက် ဆက်လက်ပြီးဆောင်ရွက်ရန် အချိန်တန်ပြီဖြစ်ပါတယ်”ဟု ဗိုလ်မှူးကြီးဉာဏ်နိုင်က ရဲရဲဝံ့ဝံ့ထပြောလိုက်သည်။

ထိုဆွေးနွေးမှုအပေါ် ပြည်ခိုင်ဖြိုးပါတီ မင်းလှမြို့နယ် ပြည်သူ့လွှတ်တော်ကိုယ်စားလှယ် ဦးမောင်တိုးက “တစ်ရာခိုင်နှုန်းသော လူထုတွေကသာ ဒီလိုမျိုးစာတွေတင်ပြီးတော့ ဒီပြည်သူအများစုထောက်ခံတဲ့ ကိုယ်စားလှယ်တွေကို ဒုက္ခပေးလို့ရမယ်ဆိုရင် အဲဒီဟာတွေကို ရှင်းနေတာနဲ့တင်ပဲ ကျွန်တော်တို့ ရွေးကောက်ပွဲကော်မရှင်ရော၊ လွှတ်တော်တွေရော အင်မတန်ရှုပ်သွားမှာ ဖြစ်ပါတယ်”ဟု ပြန်လည်ချေပဆွေးနွေးခဲ့သည်။

လွှတ်တော်ကိုယ်စားလှယ်တာဝန်မှ ပြန်လည်ရုပ်သိမ်းခြင်းဥပဒေကြမ်းကို ရွေးကောက်ပွဲကော်မရှင်မှ ပြည်ထောင်စုလွှတ်တော်သို့ ၂၀၁၂ ခုနှစ် သြဂုတ် ၂၇ ရက်၌ ပေးပို့ခဲ့ပြီး တစ်နှစ်နီးပါးအကြာတွင် ပြည်သူ့လွှတ်တော်ဥပဒေကြမ်းကော်မတီမှ အစီရင်ခံစာဖတ်ကြားသည့်အခါ ထိုသို့ ငြင်းခုံပြောဆိုကြခြင်းဖြစ်သည်။

အစီရင်ခံစာအရ အဆိုပါဥပဒေကြမ်းကို ဖွဲ့စည်းပုံအခြေခံဥပဒေ လေ့လာသုံးသပ်ရေးကော်မတီ အစီရင်ခံစာထွက်ရှိလာသည်အထိ ဆိုင်းငံ့ထားသင့်ကြောင်း တင်သွင်းခဲ့ရာ ပြည်သူကရွေးချယ်ခြင်းမဟုတ်ဘဲ ကာကွယ်ရေးဦးစီးချုပ်က အမည်စာရင်းတိုက်ရိုက်တင်သွင်းသည့် တပ်မတော်သားကိုယ်စားလှယ်များက ကန့်ကွက်ခဲ့ပြီး ဥပဒေကို အမြန်ဆုံးပြဋ္ဌာန်းနိုင်ရန် ဆွေးနွေးခဲ့သည်။

သို့သော် ရွေးကောက်ခံအမတ်များက ထိုဥပဒေကြမ်းကိုဆိုင်းငံ့ထားရန် ထောက်ခံဆွေးနွေးခဲ့သည်။

“ဘုရားကိုတောင် မကြိုက်တဲ့လူရှိတာ ဖြစ်တဲ့အတွက် လွှတ်တော်ကိုယ်စားလှယ်တစ်ယောက်ကို တစ်ရာခိုင်နှုန်းနဲ့ပြန်ခေါ်ဖို့အတွက်ကို လုပ်မယ်ဆိုရင်တော့ အဲဒီဟာတွေနဲ့ပဲ အလုပ်တွေရှုပ်နေမှာပါ။ တစ်ရာခိုင်နှုန်းကို အလွယ်တကူ ဆန့်ကျင်ဘက်အဖွဲ့အစည်းတွေက ရနိုင်တယ်ဆိုတာကို ရွေးကောက်ခံဖူးတဲ့ပုဂ္ဂိုလ်တွေအားလုံး သိပါတယ်”ဟု ပြည်ခိုင်ဖြိုးအမတ် ဦးမောင်တိုးက ဆက်လက်ဆွေးနွေးခဲ့သည်။

“တကယ်ပြည်သူလူထုရဲ့ ထောက်ခံမှုကိုရထားပြီးသားဆိုရင် တစ်ရာခိုင်နှုန်းကို ကြောက်စရာမလိုပါဘူး။ ပြည်သူလူထုနဲ့ ထိတွေ့ဆက်ဆံမှုရှိတယ်ဆိုရင် တစ်ရာခိုင်နှုန်းကို ကြောက်စရာမလိုပါဘူး”ဟု နိုင်ငံရေးလေ့လာသူ စီးပွားရေးလုပ်ငန်းရှင်တစ်ဦးဖြစ်သူ ဦးကျော်စွာမြင့်ကပြောသည်။

၂၀၁၀ ရွေးကောက်ပွဲဖြင့်တက်လာသော လွှတ်တော်အမတ်အများစုသည် သက်ဆိုင်ရာမဲဆန္ဒနယ်များမှ ပြည်သူများကထောက်ခံခဲ့သူများ မဟုတ်ခဲ့သည့်အတွက် တစ်ရာခိုင်နှုန်းသော မဲဆန္ဒရှင်များက လက်မှတ်ထိုးပြီး ကိုယ်စားလှယ်အဖြစ်မှ ရုပ်သိမ်းမည့်ကိစ္စကို အန္တရာယ်ရှိသည်ဟု သဘောပေါက်သဖြင့် ယခုကဲ့သို့ ကန့်ကွက်ခြင်းဖြစ်ကြောင်း နိုင်ငံရေးလေ့လာသူ ဦးကျော်လင်းဦးက မှတ်ချက်ပြုသည်။ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေ အခန်း ၉ လွှတ်တော်ကိုယ်စားလှယ်တာဝန်မှ ပြန်လည်ရုပ်သိမ်းခြင်း ပုဒ်မ၃၉၆ (ခ)တွင် သက်ဆိုင်ရာမဲဆန္ဒနယ် မူလမဲဆန္ဒရှင်များအနက် အနည်းဆုံးတစ်ရာခိုင်နှုန်းတို့က တာဝန်မှပြန်လည်ရုပ်သိမ်းလိုသော လွှတ်တော်ကိုယ်စားလှယ်များနှင့် ပတ်သက်သည့် တိုင်တန်းချက်ကို ပြည်ထောင်စုရွေးကောက်ပွဲကော်မရှင်ထံ တင်ပြရမည်ဟု ဖော်ပြထားသည်။

ထို့နောက် ရွေးကောက်ပွဲကော်မရှင်က ဥပဒေနှင့်အညီ စုံစမ်းစစ်ဆေးရမည်။ ပြည်ထောင်စုရွေးကောက်ပွဲကော်မရှင်က ထိုစွပ်စွဲချက်သည်မှန်ကန်ပြီး စွပ်စွဲခံရသူသည် လွှတ်တော်ကိုယ်စားလှယ်အဖြစ် ဆက်လက်ထမ်းရွက်စေရန် မသင့်ကြောင်း သဘောရရှိလျှင် ပြည်ထောင်စုရွေးကောက်ပွဲကော်မရှင်သည် ဥပဒေနှင့်အညီ ဆောင်ရွက်ရမည်ဟု ပြဋ္ဌာန်းထားသည်။

“တစ်ရာခိုင်နှုန်းက တင်ပြရမည်ဆိုပေမယ့်လည်း တစ်ရာခိုင်နှုန်းတင်ပြတိုင်း မဟုတ်ပါဘူး။ ကျွန်တော်တို့လေ့လာစုံစမ်းစစ်ဆေးပြီး ပြန်ပြီးတော့ဆန္ဒခံယူပြီး ၅၀ ရာခိုင်နှုန်းကျော်မှ သူ့ကို အရေးယူသင့်၊ မယူသင့်ဆိုတာကို ဆုံးဖြတ်မှာဖြစ်ပါတယ်”ဟု တပ်မတော်သားကိုယ်စားလှယ် ဗိုလ်မှူးကြီးမင်းကိုကိုကဆွေးနွေးခဲ့သည်။

“ဥပဒေပြုနေကြတဲ့ ကျွန်တော်တို့လွှတ်တော်ကိုယ်စားလှယ်တွေရဲ့ စည်းမျဉ်းစည်းကမ်းတွေကရော ဘယ်လိုရှိရမယ်၊ ဘယ်လိုလိုက်နာရမယ်၊ ဘယ်လိုလုပ်ကြရမယ်ဆိုတာတွေလည်း လိုအပ်မယ်ထင်ပါတယ်”ဟု တပ်မတော်သားလွှတ်တော်ကိုယ်စားလှယ် ဗိုလ်မှူးကြီးမင်းကိုကိုက ပါဝင်ဆွေးနွေးခဲ့သည်။

“အခုဆိုရင် လွှတ်တော်သက်တမ်းကလည်း သုံးနှစ်ပြည့်တော့မယ်။ ပြည်သူ့ဘက်ကကြည့်ရင် သူတို့ပြန်ခေါ်ချင်တဲ့ ကိုယ်စားလှယ်ကို ဥပဒေမရှိတဲ့အတွက် ပြန်မခေါ်နိုင်တာ ဒါကပြည်သူ့ဘက်က နစ်နာတယ်”ဟု ရှေ့နေဦးကိုနီကပြောသည်။

၂၀၀၈ ခုနှစ် ရွေးကောက်ပွဲပြီးနောက် ပြည်ခိုင်ဖြိုးပါတီ တောင်ဥက္ကလာပမြို့နယ်နှင့် ကြည့်မြင်တိုင်မြို့နယ် လွှတ်တော်အမတ်များကို သက်ဆိုင်ရာမဲဆန္ဒနယ်မှ တစ်ရာခိုင်နှုန်းကျော်သော ပြည်သူများက လွှတ်တော်အမတ်အဖြစ်မှ ရုပ်သိမ်းပေးရန် ရွေးကောက်ပွဲကော်မရှင်သို့ တင်ပြခဲ့သော်လည်း ဥပဒေမရှိသဖြင့် ယခုချိန်ထိ မည်သည့်အဖြေမှမထွက်ခဲ့ပေ။

“ဖွဲ့စည်းပုံအခြေခံဥပဒေကို ငြင်းစရာမရှိပါဘူး။ ဒါပေမဲ့လည်း ပုဒ်မ ၃၉၇ မှာ ပြဋ္ဌာန်းဥပဒေလိုပါတယ်။ ဒီတစ်ရာခိုင်နှုန်းဆို Initiate လုပ်လို့ရပြီ။ ရတဲ့ဟာကို တရားမျှတဖို့၊ မှန်ကန်ဖို့အတွက် ဥပဒေပြဋ္ဌာန်းဖို့လိုပါတယ်။ ဥပဒေပြဋ္ဌာန်းတဲ့အခါ တရားမျှတဖို့လိုပါတယ်။ မှန်ကန်ဖို့လိုတယ်။ ဒီစွပ်စွဲခံရတဲ့ ကိုယ်စားလှယ်တွေအတွက် ကာကွယ်တာ၊ ပြည်သူတွေအတွက် ကာကွယ်တာ ပြည်သူ့ကိုယ်စားလှယ်ပဲ”ဟု ကျောက်ဖြူမြို့နယ် ပြည်သူ့လွှတ်တော်ကိုယ်စားဦးဘရှိန်က ဆွေးနွေးခဲ့သည်။

ထို့ကြောင့် ဖွဲ့စည်းပုံအခြေခံဥပဒေ လေ့လာဆန်းစစ်ရေးကော်မတီက သုံးသပ်ချက်များ ထွက်ပေးလာပြီးနောက်ပိုင်း ဆောင်ရွက်ပါက နိုင်ငံတော်နှင့် ပြည်သူ့အတွက် တန်ဖိုးရှိပါလိမ့်မည်ဟု ဦးဘရှိန်ကဆွေးနွေးခဲ့သည်။

“Right Of Recall ဆိုတာ အခြေခံဥပဒေနဲ့မဆိုင်ပါဘူး။ အခြေခံဥပဒေဆိုတာကတော့ တစ်အုပ်လုံးကို ပြင်သင့်တာပဲ။ အားလုံးသိနေတဲ့ကိစ္စ။ ဒါပေမဲ့ Right Of Recall ကတော့ ပြဋ္ဌာန်းသင့်တာကြာပြီ””ဟု ရှေ့နေဦးကိုနီကဆိုသည်။

လွှတ်တော်ကိုယ်စားလှယ်တာဝန်မှ ပြန်လည်ရုပ်သိမ်းနိုင်သည့် ဥပဒေသည် ရှိရန်လိုအပ်သော်လည်း ဖွဲ့စည်းပုံတွင်ပါရှိသည့် တစ်ရာခိုင်နှုန်းစနစ်သည် အခြားတိုင်းပြည်များတွင်လည်း မရှိသည့်အတွက် ပြင်ဆင်ရန်လိုအပ်ခြင်းဖြစ်သည်ဟု အမျိုးသားဒီမိုကရေစီအဖွဲ့ချုပ်ပါတီမှ ပြည်သူ့လွှတ်တော်ကိုယ်စားလှယ်ဦးဝင်းမြင့်ကပြောသည်။

ဘယ်လောက်ရာခိုင်နှုန်းပဲဖြစ်ဖြစ် ဥပဒေကရေးမယ်ဆိုပေမယ့် အခုချိန်မှာ အခြေခံဥပဒေ လေ့လာသုံးသပ်ရေးကော်မတီဆိုတာရှိနေပြီဆိုတော့ ဒီကော်မတီက ဒါကိုပြင်ဖို့အတွက်ပြောမှာပဲ။ ဒါကြောင့် ကော်မတီကတင်မယ့် ပြင်ဆင်ရေးမှာ ဒီအချက်ကပါသွားမှာပဲဟု အဆိုပါကော်မတီအဖွဲ့ဝင်တစ်ဦးလည်းဖြစ်သည့် ဦးဝင်းမြင့်ကပြောသည်။

အိန္ဒိယနှင့်ဗြိတိန်ကဲ့သို့ ဒီမိုကရေစီနိုင်ငံကြီးများတွင်ပင် အဆိုပါ တစ်ရာခိုင်နှုန်းစနစ်မရှိသည့်အတွက် ပြန်လည်သုံးသပ်ရန်လိုသည်ဟု ပြည်သူ့လွှတ်တော်ဥပဒေကြမ်းကော်မတီက တင်ပြထားသည်။

သို့သော် ယခုကဲ့သို့ လွှတ်တော်ကိုယ်စားလှယ်တာဝန်မှ ပြန်လည်ရုပ်သိမ်းခြင်းဥပဒေကြမ်းနှင့်ပတ်သက်၍ ဖွဲ့စည်းပုံအခြေခံဥပဒေ လေ့လာသုံးသပ်ရေးကော်မတီအစီရင်ခံစာ ထွက်ရှိလာသည်အထိ ဆိုင်းငံ့ထားသင့်ကြောင်း တင်သွင်းခဲ့သည့်အဆိုကို ရွေးကောက်ခံမဟုတ်သည့် တပ်မတော်သားကိုယ်စားလှယ်များက ကန့်ကွက်သည့်အဆိုနောက်ကွယ်တွင် အခြားသော နိုင်ငံရေးအရ ဆက်စပ်မှုများ ရှိလာနိုင်ကြောင်းလည်း နိုင်ငံရေးလေ့လာသုံးသပ်သူအချို့က ဆိုသည်။

တပ်မတော်တပ်ရင်းများရှိသော မြို့နယ်များတွင် သက်ဆိုင်ရာမဲဆန္ဒနယ်၏ မဲဆန္ဒရှင်များအနက် အနည်းဆုံးတစ်ရာခိုင်နှုန်းမှာ တပ်မတော်သားကိုယ်စားလှယ်များနှင့်ပင် ပြည့်နိုင်ကြောင်း ထောက်ပြပြောဆိုမှုများရှိသည်။

“တပ်မတော်သားကိုယ်စားလှယ်က အပြန်အလှန် Check and Balance ဖြစ်တယ်ဆိုတာကို ဘာကိုဆိုလိုတာလဲလို့ ကျွန်တော် အတိအကျမပြောနိုင်ပေမယ့် လွှတ်တော်ကိုယ်စားလှယ်ကို တာဝန်မှပြန်လည်ရုပ်သိမ်းဖို့တာဝန်ကို ပြည်ထောင်စုရွေးကောက်ပွဲကော်မရှင်ကို အပ်နှင်းတဲ့အချက်က သတိပြုဖို့ကောင်းတယ်”ဟု လွှတ်တော်ကိုယ်စားလှယ်ဦးရဲထွန်းကပြောသည်။

ရွေးကောက်ပွဲကော်မရှင်ဥက္ကဋ္ဌနှင့် အဖွဲ့ဝင်ငါးဦးကို နိုင်ငံတော်သမ္မတက ပြည်ထောင်စုဝန်ကြီးများ ခန့်အပ်သည့် လုပ်ထုံးလုပ်နည်းအတိုင်း မိမိကြိုက်နှစ်သက်သူအား ခန့်အပ်နိုင်သည်။

သမ္မတ၊ ဒုသမ္မတနှင့် ပြည်ထောင်စုအဆင့်ပုဂ္ဂိုလ်များအား လွှတ်တော်မှ စွပ်စွဲပြစ်တင်ဖြုတ်ချနိုင်သကဲ့သို့ လွှတ်တော်ဥက္ကဋ္ဌနှင့် လွှတ်တော်ကိုယ်စားလှယ်များကို မဲဆန္ဒရှင်တစ်ရာခိုင်နှုန်းက တိုင်တန်းစစ်ဆေးတွေ့ရှိပါက သမ္မတခန့်အပ်ထားသော ရွေးကောက်ပွဲကော်မရှင်က ဖြုတ်ချနိုင်သည်။ အပြန်အလှန် ထိန်းကျောင်းပြုလုပ်ထားသည်။

“တပ်မတော်သားကိုယ်စားလှယ်တွေက လက်ရှိအစိုးရနဲ့နီးစပ်တဲ့သဘောရှိတယ်။ တပ်မတော်သားကိုယ်စားလှယ်တွေရဲ့ အဆိုပြုချက်က အစိုးရဘက်ကို ကာကွယ်တဲ့သဘောမျိုး တွေ့ရတယ်”ဟု နိုင်ငံရေးလေ့လာသူ ဦးကျော်လင်းဦးကသုံးသပ်သည်။

သို့သော် တပ်မတော်သားများ ထောက်ခံဆွေးနွေးခြင်းနှင့်ပတ်သက်၍ ဦးကျော်စွာမြင့်က “၂၀၁၀ ရွေးကောက်ပွဲတုန်းက ပြည်သူထုရဲ့ထောက်ခံမှုကို ရခဲ့သလားဆိုတာကို တပ်မတော်အနေနဲ့ အခုအချိန်မှာ စိန်ခေါ်လိုက်တဲ့သဘောပဲ။ အနှစ်သာရဖြင့်ပြောရရင်”ဟု မှတ်ချက်ပြုပြောကြားသည်။

ထိုကဲ့သို့ ရွေးကောက်ခံ လွှတ်တော်ကိုယ်စားလှယ်များနှင့် အခန့်အပ်ခံ တပ်မတော်သားလွှတ်တော်ကိုယ်စားလှယ်များကြား အငြင်းပွားခဲ့သော အဆိုကို ပြည်သူ့လွှတ်တော်ဥက္ကဋ္ဌက အသံစနစ်ဖြင့်“ကန့်ကွက်သူရှိပါသလား သုံးကြိမ်မေးမြန်းသောအခါ ကန့်ကွက်သူမရှိသဖြင့် အဆိုပါဥပဒေကြမ်းကို ဆိုင်းငံ့ထားရန် အတည်ပြုလိုက်သည်။ ။

ရေးသားသူ- အောင်သူရ၊အိဖြူလွင်
7Day News Journal