လူ့စွမ်းအား အရင်းအမြစ်အပြု ... ကျန်းမာရေး မူဝါဒအပြောင်း

လက်ရှိအစိုးရ၏ ကျန်းမာရေးကဏ္ဍ ပြုပြင်ရေး အပိုင်းများအနက် သိသာထင်ရှားသည့် ပြောင်းလဲမှုတစ်ခုကို ဇူလိုင် လ ၁ ရက်နေ့က နိုင်ငံပိုင်သတင်းစာတွင် တရားဝင် ထုတ်ပြန်ခဲ့ရာ ယင်းအပြောင်းအလဲသည် အစိုးရသစ်လက်ထက် မတိုင်ခင် ဦးနှောက်ယိုစီးမှု ဖြစ်ပေါ်ခဲ့သော မြန်မာ နိုင်ငံ၏ အခြေအနေကို တစ်စိတ်တစ်ပိုင်း ပြန်လည် ဖြည့်ဆည်းခြင်းဟုလည်း ယူဆနိုင်သည်။

ကျန်းမာရေးဝန်ကြီးဌာန မြန်မာနိုင်ငံ ဆေးကောင်စီက ပြည်ပနိုင်ငံ များမှ ဆေးပညာဘွဲ့ M.B.B.S နှင့် အလားတူ ဘွဲ့ရရှိပြီးသူ မြန်မာနိုင်ငံသား ဆရာဝန်များအတွက် ပထမဆုံးအကြိမ် ဆေးကုသမှု လိုင်စင်ထုတ်ပေးရန် ယခုလဆန်းပိုင်းတွင် ကြေညာထားသည်။

မြန်မာနိုင်ငံတွင် အစိုးရ အဆက်ဆက် ပြည်ပရောက် မြန်မာနိုင်ငံသား ဆရာဝန်များကို ပြည်တွင်း၌ တရားဝင် ဆေးကုခွင့် မပြုသည့်အတွက် လူ့စွမ်းအား အရင်းအမြစ်များစွာ ဆုံးရှုံးခဲ့ရသည်။ ယင်းကြောင့် မိမိနိုင်ငံသားများ၏ လူ့အရင်းအမြစ် ပြန်လည် စီးဝင်လာရေးအတွက် ယခုကဲ့သို့ ဖိတ်ခေါ်မှုကို ကြိုဆိုရမည် ဖြစ်သည်။

ကျန်းမာရေးကဏ္ဍတွင် အခြေခံ လိုအပ်ချက်များ ရှိနေသော်လည်း ပြည်တွင်းတွင် ကုသပေးနေသော ဆရာဝန်များနှင့် ပြည်တော် ပြန်ဝင်လာမည့် ဆေးပညာဆိုင်ရာ အတွေ့အကြုံ ရှိပြီးသော မြန်မာနိုင်ငံသား ဆရာဝန်များ ပူးပေါင်းဆောင်ရွက် မည်ဆိုပါက အစိုးရ၏ကျန်းမာရေး ပြုပြင်ပြောင်းလဲရေးတွင် အထောက်အကူ ဖြစ်လာနိုင်သည်။ အထူးသဖြင့် ပြည်ပနိုင်ငံများတွင် အလုပ်မှ အနားယူပြီးသော ပါရဂူ၊ သမားတော်ကြီးများ ပြည်တော်ပြန် ဝင်လာပြီး နိုင်ငံ၏ လူ့စွမ်းအား အရင်းအမြစ်ပိုင်း မြှင့်တင်ရေး လုပ်ငန်းများ လာရောက် လုပ်ကိုင်လျှင် ပိုအကျိုးသက်ရောက်မှု ရမည် ဖြစ်ကြောင်း ဆေးပညာ အသိုင်းအဝိုင်းက သုံးသပ်ကြသည်။

တစ်ဖက်တွင်လည်း ဆေးပညာ ဘွဲ့ရချင်းတူလျှင်ပင် ပြည်တွင်း တွင် ပြည်သူ့ကျန်းမာရေးဌာနတွင် တာဝန်ထမ်းနေသော လက်ထောက် ဆရာဝန်တစ်ဦးသည် တစ်လလျှင် အခြေခံလစာကျပ် တစ်သိန်းခွဲသာရရှိပြီး ပုဂ္ဂလိက ဆေးရုံများတွင် တာဝန်ထမ်းဆောင်နေသူ လက်ထောက် ဆရာဝန်တစ်ဦးသည် တစ်လလျှင် ပျမ်းမျှအားဖြင့် ကျပ်နှစ်သိန်းမှ သုံးသိန်းရရှိသည်။

အဆိုပါပမာဏသည် ပြည်ပနိုင်ငံတစ်နိုင်ငံတွင် လက်ထောက်ဆရာဝန်အဖြစ် လုပ်ကိုင်နေသူတစ်ဦး၏ ဝင်ငွေနှင့် အဆများစွာ ကွာခြားလှကာ အခြားဝန်ဆောင်မှု ပိုင်းတွင်လည်း သိသိသာသာ ကွာခြားမှုများ ရှိနေသေးသည်။ ထို့ကြောင့် အစိုးရက ဖိတ်ခေါ်နေသော်လည်း ပြည်တော် ပြန်ဝင်ရန် နိုင်ငံသားဆရာဝန်များ စိတ်ဝင်စားမှု ရှိ၊ မရှိဆိုသည့် မေးခွန်းများ ထပ်မံပေါ်ပေါက်လာသည်။

ပုဂ္ဂလိက ဆေးရုံတစ်ရုံရှိ ဆရာဝန်တစ်ဦး၏ အခြေခံလစာ၊ အခြားအခြေခံ လိုအပ်ချက်များ၊ ဆေးရုံသုံး ဆေးပစ္စည်းများ ပံ့ပိုးမှု အပိုင်းသည် ပြည်ပနိုင်ငံများနှင့် များစွာကွာခြားလျက် ရှိသည့်အပြင် ကျန်း မာရေး စောင့်ရှောက်မှု မူဝါဒပိုင်းတွင်လည်း ကွဲပြားမှုများ ရှိနေသည်။
“သူတို့လစာဆိုရင် အချိုးအဆကအစ အများကြီးကွာတယ်။ ဒါကို လက်ခံနိုင်၊ မနိုင်ပေါ်မူတည်ပြီး ဘယ်လောက် ဝင်လာနိုင်မလဲ သိနိုင်မယ်” ဟု အင်းစိန်မြို့နယ်ရှိ ပုဂ္ဂလိကဆေးရုံ တစ်ခုဖြစ်သော သီရိစန္ဒာဆေးရုံ၏ အုပ်ချုပ်မှုဒါရိုက်တာ ဦးမိုးနိုင်မြင့်က သုံးသပ်ပြောဆိုသည်။

“ပြန်လာတဲ့ ဆရာဝန်တွေအတွက် ပတ်ဝန်းကျင်တစ်ခု ဖန်တီးပေးဖို့လိုတယ်။ ဒီကရှိနေတဲ့ ဆရာဝန်နဲ့ ပြန်လာတဲ့ ဆရာဝန်တွေကိုလည်း လိုက်လျောညီထွေအောင် ဖန်တီးပေးရမယ်” ဟု ခွဲစိတ်ပါရဂူ ဒေါက်တာတင်မျိုးဝင်းက အကြံပြုသည်။

ယင်းသို့ပြင်ဆင်မထားပါက ပြည်တော်ပြန်ဝင်မည့် ဆရာဝန်ဦးရေ နည်းပါးနိုင်မည်ဟု ဆေးပညာ အသိုင်းအဝိုင်းက သုံးသပ်ကြသည်။

“ပြန်လာမှာက လက်တစ်ဆုပ်စာလောက်ပဲ ရှိပါတယ်။ ဒီကဆရာဝန်တွေကို ထိခိုက်မှု မဖြစ်စေနိုင်ပါဘူး” ဟု လက်ရှိ ဆရာဝန်များ၏ ရပ်တည်မှု အနေအထားကို ဆေးတက္ကသိုလ် ပါမောက္ခချုပ်တစ်ဦးက The Voice သို့ သုံးသပ်ပြောကြားသည်။

ယခင် ၁၉၉၅ ခုနှစ်မတိုင်ခင် မြန်မာနိုင်ငံ၏ ဆေးတက္ကသိုလ် ဘွဲ့လက်မှတ်သည် နိုင်ငံတကာ အသိအမှတ်ပြု ဖြစ်သောကြောင့် ဆေးပညာဘွဲ့ ရရှိပြီးသူ အချို့သည် ဗြိတိန်နှင့် အမေရိကန်ပြည်ထောင်စုတို့သို့ ပညာဆက်လက် ဆည်းပူးရန် သွားရောက်ကြသည်။

လက်ရှိအခြေအနေတွင် ဆရာဝန်များ နိုင်ငံခြားတက္ကသိုလ်များသို့ သွားရောက်သင်ကြားပါက နိုင်ငံအလိုက် အသိအမှတ်ပြု ဝင်ခွင့်စာမေးပွဲများ ပြန်လည်ဖြေဆိုရပြီး တိုက်ရိုက် အသိအမှတ်ပြုမှု နည်းပါးလာသည်။ ထို့ကြောင့် ပြည်ပတွင် ဆေးပညာဘာသာရပ် သင်ကြားလိုသူ လူငယ်များသည် အာရှဒေသတွင်း တက္ကသိုလ်များကိုသာ ရွေးချယ်တက်ရောက်ပြီး ပြည်တွင်းသို့ ပြန်မလာဘဲ အခွင့်အလမ်းသာသော ယင်းနိုင်ငံတို့၌ပင် အလုပ်ဆက်လုပ်ကြသည်။ ပြည်ပတွင် ဆေးပညာ သွားရောက်သင်ယူသော ပမာဏမှာမူ လက်ရှိဆေးတက္ကသိုလ် လေးခုမှ မွေးထုတ်ပေးနေသည့် ပမာဏထက် နည်းပါးနေပါသေးသည်။

မြန်မာနိုင်ငံရှိ ဆေးတက္ကသိုလ်များသည် တစ်နှစ်လျှင် ဆေးပညာ ဘွဲ့ရရှိပြီးသူ တစ်ထောင့်နှစ်ရာနီးပါး မွေးထုတ်ပေးလျက် ရှိသော်လည်း ပြည်သူ့ဆေးရုံများတွင် လက်ထောက် ဆရာဝန်များအဖြစ် ပြန်လည် ခန့်ထားရာတွင်မူ အကန့်အသတ်များ ရှိနေသည့်အတွက် အလုပ်လိုအပ်နေသော ဆေးပညာဘွဲ့ရများစွာ ကျန်ရှိနေပါသည်။

အလုပ်ရရှိမှု ကြန့်ကြာမှုများကြောင့်လည်း ဆရာဝန်အလုပ်ကို စွန့်လွှတ်လိုက်သူများ ၊ နိုင်ငံခြား ပညာသင် သွားသူများလည်း ထပ်မံပေါ်ထွက်လာပြန်သည်။

အစိုးရက လူ့စွမ်းအားအရင်းအမြစ် မွေးထုတ်နေချိန် ယင်းအခက်အခဲများ ဖြစ်ပေါ်လာရသည့် အဓိက အကြောင်းအရင်းသည် အစိုးရ၏ အမျိုးသား ကျန်းမာရေး မူဝါဒပိုင်း အားနည်းချက်ကြောင့် ဖြစ်ပြီး ယခင်အစိုးရလက်ထက် ရေးဆွဲထားသော မူဝါဒတွင် အသစ်ရေးဆွဲရန် လိုအပ်လာကြောင်း NLD ကျန်းမာရေးကွန်ရက် ဥက္ကဋ္ဌ ဖြစ်သူ ခွဲစိတ်ပါရဂူ ဒေါက်တာတင်မျိုးဝင်းက သုံးသပ်သည်။

အလားတူ ယခင်ကဆေးပညာ ဘွဲ့ရများအတွက် ဆေးကုသခွင့် လိုင်စင်ကို နိုင်ငံရေးပြစ်မှုကင်း၊ မကင်း စိစစ်၍ ထုတ်ပေးပြီး နိုင်ငံရေးနှင့် ဆက်နွှယ်လာပါက လိုင်စင်သိမ်းသည်အထိ ကျပ်တည်း ခဲ့သည်။ ယခုအခါ မူဝါဒ အပြောင်းအလဲများကြောင့် လိုင်စင် ပြန်လည်ချပေးခြင်း၊ သက်တမ်းတိုးပေးခြင်းတို့ ပြုလုပ်လာခဲ့သည်။

ယခင်က ဆေးကုသခွင့် လိုင်စင်ရရှိရန် တစ်လနီးပါး သင်တန်း တက်ရသော်လည်း ယခုအခါ ဆေးပညာဘွဲ့ ရရှိပြီးပါက ကုသခွင့်လိုင်စင် ရရှိသည်။

မြန်မာနိုင်ငံသို့ ဝင်ရောက်လာသည့် နိုင်ငံသား ဆရာဝန်များ အတွက်မူ ဆေးကောင်စီစာမေးပွဲ ဖြေဆိုရန် လိုအပ်ပြီး အဆိုပါစာမေးပွဲတွင် ခန္ဓာဗေဒ၊ ဇီဝကမ္မဗေဒ၊ ဇီဝဓာတုဗေဒ၊ ဆေးဝါးဗေဒ၊ အဏုဇီဝဗေဒ၊ ရောဂါဗေဒ၊ ကာကွယ်ရေးနှင့် လူမှုရေးဆေးပညာ၊ ဥပဒေရေးရာ ဆေးပညာ၊ ဆေးပညာ၊ ကလေးကျန်းမာ ရေးပညာ၊ ခွဲစိတ်ကုပညာနှင့် သားဖွား မီးယပ်ပညာ ဘာသာရပ်များကို လက်တွေ့ စာတွေ့ စိစစ်ထားသည်။

ဆေးပညာ လောကတွင် ပြည်ပမှ ရောက်ရှိလာသည့် ဆရာဝန်တိုင်းကို ယုံကြည်စိတ်ချနိုင်မည် မဟုတ်ရာ ယင်းသို့ ပြည်တွင်းပြန်ဝင်လာမည့် ဆရာဝန်များအတွက် အရည်အချင်း စိစစ်ထားသော စာမေးပွဲများ ကျင်းပပေးသောကြောင့် ပြည်သူများအတွက် ယုံကြည်စိတ်ချစွာ ကုသနိုင်မည် ဖြစ်သည်။။ အမျိုးမျိုးသော နောက်ခံ အကြောင်းရင်းများ ရှိနိုင်သောကြောင့် စာမေးပွဲ စစ်ဆေးလက်ခံခြင်းသည် အကောင်းဆုံး ဖြစ်ကြောင်း ပြည်တွင်း ဆေးပညာရှင်အချို့က အကြံပြုပြော ဆိုသည်။

ပြုပြင်ပြောင်းလဲမှုများ လုပ်ဆောင်နေသော မြန်မာနိုင်ငံ လက်ရှိလိုအပ်ချက်နှင့် လိုက်လျောညီထွေမှု ရှိသော မူဝါဒတစ်ခု မြန်မာ့ ကျန်းမာရေးလောကအတွက် လိုအပ်လာသည်။

ပညာရေး ပြုပြင်ပြောင်းလဲရေး၏ အကျိုးရလဒ်သည် ရေရှည်ဆယ်စုနှစ် တစ်ခုအကြာ ထင်ဟပ်နိုင်မည် ဖြစ်သော်လည်း ကျန်းမာရေးကဏ္ဍ ပြောင်းလဲရေးသည် ချက်ချင်းသိသာစေနိုင်သောကြောင့် မူဝါဒများ၊ ဆေးပညာဥပဒေများ မြန်မြန် ပြင်ဆင်ထားရန် တိုက်တွန်းလိုကြောင်း ဒေါက်တာတင်မျိုးဝင်းက သုံးသပ်ပြောဆိုသည်။

ကဏ္ဍပေါင်းစုံအတွက် လူ့စွမ်းအား အရင်းအမြစ်ပိုင်း ဖြည့်ဆည်းခြင်း သည် ပြုပြင်ပြောင်းလဲရေး ကာလအတွက်များစွာ အထောက်အပံ့ ဖြစ်စေရာ ကျန်းမာရေးကဏ္ဍတွင်လည်း အဆင့်မြင့် နည်းပညာ ရရှိထားသူ လူ့စွမ်းအား အရင်းအမြစ်များ လိုအပ်နေသဖြင့် ကျန်းမာရေး ဝန်ကြီးဌာန၏ ပြည်ပရောက် နိုင်ငံသားဆရာဝန်များ ဆေးကုသခွင့်လိုင်စင် ထုတ်ပေးရေး အစီအစဉ်က ယင်းလိုအပ်ချက်ကို မည်မျှ ထိရောက်စွာ ဖြည့် တင်းနိုင်မည်ကို မျှော်လင့်တကြီး စောင့်ကြည့်ရမည် ဖြစ်သည်။

လဲ့ရည်မြင့် - The Voice Weekly