ဒူဘိုင်းတွင် မုဒိမ်းကျင့်ခံရသည့် အမျိုးသမီး ထောင်ဒဏ်ချမှတ်ခံရ

ဒူဘိုင်းတွင် မုဒိမ်းကျင့်မှုလည်းခံရ၊ ထောင်ချခြင်းလည်း ခံရသည့် နော်ဝေး အမျိုးသမီး တစ်ဦးအတွက် မကြာသေးမီက ဥရောပ မီဒီယာများက အလေးအနက် ဖော်ပြမှုများ ပြုလုပ်ခဲ့ကြောင်း သိရှိရသည်။ နော်ဝေးမှ အမျိုးသမီး တစ်ဦးသည် သူမကို မုဒိမ်းကျင့်သည့်အတွက် ဒူဘိုင်း တရားရုံးတွင် တိုင်တန်းခဲ့သော်လည်း တရားရုံးက သူမကို ထောင်ဒဏ် (၁၆)လ ချမှတ်ခဲ့သည်။ မာတီဒိုဘရာ ဒီလက်ဗ်ကို တရားရုံးက စွဲချက်(၃)ခု တင်ခဲ့သလို သူမအနေဖြင့် မုဒိမ်းကျင့် ခံရသည် ဆိုသည်ကိုလည်း ပယ်ချခဲ့ကြောင်း သိရသည်။ အသက်(၂၄)နှစ်ရှိ မာတီက သူမကို လုပ်ဖော်ကိုင်ဖက် တစ်ဦးက မုဒိမ်းကျင့်ကြောင်း တရားရုံးသို့ တိုင်ကြားခဲ့သော်လည်း လက်တွေ့တွင်မူ ထိုအမှု ပလပ်ခံရသည့်အပြင် စွဲချက်(၃)ခုနှင့်ပါ ရင်ဆိုင်ခဲ့ရသည်။

သူမကို ဒူဘိုင်း တရားရုံးက တရားမဝင် လိင်ဆက်ဆံမှု၊ လိမ်လည်တိုင်ကြားမှု၊ ခွင့်ပြုချက်မရှိဘဲ အရက်သေစာ သောက်စားမှုများဖြင့် စွဲချက်တင်ကာ ထောင်ဒဏ် ချမှတ်ခဲ့ခြင်း ဖြစ်သည်။ တရားရုံးက မုဒိမ်းမှု စွဲချက်သည် မှားယွင်းခြင်းဖြစ်ပြီး သူမအနေဖြင့် လုပ်ဖော်ကိုင်ဖက်နှင့် လူ့ကျင့်ဝတ်အရ မဖြစ်သင့်သော လိင်ဆက်ဆံမှု ပြုလုပ်ခဲ့ခြင်းဟုသာ ဆုံးဖြတ်ခဲ့သည်။ ထို့အတွက် ထောင်ဒဏ်(၁)နှစ်၊ ခွင့်ပြုချက် မရှိဘဲ အရက်သေစာ သောက်စားမှုအတွက် ထောင်ဒဏ်(၃)လနှင့် မုဒိမ်းကျင့် ခံရကြောင်း လိမ်လည်တိုင်တန်းသည့်အတွက် ထောင်ဒဏ်(၁)လ အသီးသီး ချမှတ်ခဲ့ခြင်းဟု သိရှိရသည်။

ဒူဘိုင်းရှိ အယ်လ်ဆာဖာတွင် ဖြစ်ပွားခဲ့သော ကိစ္စတွင် မာတီနှင့် လုပ်ဖော်ကိုင်ဖက် ဖြစ်သူတို့သည် နိုက်ကလပ် တစ်ခုတွင် အတူရှိခဲ့ကြောင်းနှင့် အရက်အတူ သောက်ခဲ့ကြောင်း အတည်ပြုထားသည်။ နောက်ပိုင်းတွင် မာတီသည် လုပ်ဖော်ကိုင်ဖက်၏ နေအိမ်သို့ သွားရောက်ခဲ့ကြောင်းနှင့် ဒူဘိုင်းဥပဒေအရ ခွင့်မပြုသည့် ကိုယ်လက်နှီးနှောမှုများ ရှိခဲ့ကြောင်း တရားရုံးက ဆုံးဖြတ်ခဲ့သည်။ ထို့အပြင် ယင်းတို့နှစ်ဦးကြား သဘောတူ လိုက်လျောသည့် လိင်ဆက်ဆံမှုသာ ဖြစ်ခဲ့ပြီး မုဒိမ်းမှု မမြောက်ကြောင်းလည်း ဆုံးဖြတ်ကာ မာတီကို ထောင်ဒဏ် ချမှတ်လိုက်ခြင်း ဖြစ်သည်။

မာတီကလည်း သူမအနေဖြင့် အရက်သောက်ထားမှုကို ဝန်ခံခဲ့ပြီး ကိစ္စတိုင်းကို ကြည်ကြည်လင်လင် မမှတ်မိဟု ဆိုသည်။ သူမသည် ဒီဇိုင်းကုမ္ပဏီ တစ်ခုတွင် အလုပ်လုပ်ရန်အတွက် (၂၀၁၁)ခုနှစ် ကတည်းက အရှေ့အလယ်ပိုင်း ဒေသသို့ ရောက်ရှိနေခဲ့သည်။ သူမသည် အခင်းဖြစ်ပြီးနောက် ဟိုတယ်သို့ ပြန်လာကာ အမှုထမ်းထံမှတစ်ဆင့် ရဲတပ်ဖွဲ့ထံ တိုင်ကြားခဲ့ခြင်း ဖြစ်သည်။ ဒူဘိုင်းတွင် အစ္စလာမ် ဘာသာရေးနှင့် ဆက်နွယ်သည့် ဥပဒေများ ပြဋ္ဌာန်းထားသည်ကို နားလည်သော ဟိုတယ်ဝန်ထမ်းက ရဲများကို ယခုကိစ္စတွင် ဆက်နွယ်စေရန် သေချာ၊ မသေချာ သူမကို မေးမြန်းခဲ့သေးကြောင်း သိရသည်။

သို့သော်လည်း မာတီအနေဖြင့် အခြေခံ ဓလေ့ထုံးစံ ကွဲပြားသော နိုင်ငံနှစ်ခု၏ ကွဲပြားသော ဥပဒေရေးရာ တုံ့ပြန်မှုနှင့်သာ ကြုံခဲ့ရသည်။ APသတင်းဌာနသည် သူမ၏ အမည်ကို အစောပိုင်းက မဖော်ပြခဲ့သော်လည်း မာတီကိုယ်တိုင်က လူအများ သိရှိစေရန် သတင်းစာ ရှင်းလင်းပွဲတစ်ခု ပြုလုပ်ကာ သူမ၏ အခက်အခဲကို ချပြခဲ့ခြင်း ဖြစ်သည်။ သူမသည် ရဲထံ တိုင်ကြားပြီးနောက် လက်မထပ်ထားဘဲ လိင်ဆက်ဆံမှုဖြင့် အချုပ်ထဲတွင် (၄)ရက် နေခဲ့ရသည်။ အချုပ်ခန်းထဲတွင် အခြားအမျိုးသမီး တစ်ဦးထံမှ ဖုန်းကတ်ကို ငှားရမ်းကာ နော်ဝေးရှိ ပထွေးဖြစ်သူထံ ဆက်သွယ်ပြီး လွတ်လမ်းရှာနိုင်ခဲ့သည်။ နော်ဝေး သံအရာရှိများသည် မာတီ၏ လွတ်မြောက်မှုအတွက် လုပ်ဆောင်နိုင်ခဲ့ပြီး သူမက နော်ဝေးတွင် မိမိ၏ အဖြစ်အပျက်ကို လူအများထံ သိရှိစေရန် မျှဝေခဲ့ခြင်း ဖြစ်သည်။ UAEနိုင်ငံမှ အာဏာပိုင် အဖွဲ့အစည်းများကမူ ယခုကိစ္စအတွက် မှတ်ချက်ပေးခြင်း မရှိခဲ့ချေ။ UAEတွင် ယခင်ကလည်း အလားတူ ပြဿနာမျိုးများ ကြုံခဲ့ပြီး ကိစ္စအများစုတွင် အမျိုးသမီးများသာ နစ်နာခဲ့ကြောင်း သိရှိရသည်။

Planet Myanmar Network